No jobs in Unilever : डव्ह साबणापासून ते अनेक प्रसिद्ध ब्रँड्सची मालकी असणाऱ्या 'युनिलिव्हर' या कंपनीने जगभरात आपल्या नोकरभरतीवर तत्काळ प्रभावाने बंदी घातली आहे. अमेरिका आणि इराण दरम्यान पश्चिम आशियात सुरू असलेल्या युद्धामुळे निर्माण झालेली जागतिक आव्हाने पाहता, कंपनीने कनिष्ठ स्तरापासून ते वरिष्ठ स्तरापर्यंत सर्वच पदांवरील भरती किमान तीन महिन्यांसाठी थांबवली आहे.
युद्धाचा जागतिक व्यापाराला विळखा
वृत्तसंस्था 'रॉयटर्स'ने दिलेल्या माहितीनुसार, पश्चिम आशियातील तणावामुळे जागतिक व्यापारावर गंभीर परिणाम झाला आहे. या युद्धामुळे तेल आणि वायू पुरवठ्यात इतिहासातील सर्वात मोठी अडथळा निर्माण झाला आहे. ऊर्जेच्या वाढत्या किमतींमुळे केमिकल आणि प्लास्टिक उद्योगांमधील उत्पादनाचा वेग मंदावला आहे. युनिलिव्हर जरी स्थानिक पातळीवर उत्पादन करत असली, तरी कच्चा माल, पॅकेजिंग आणि प्रक्रियेसाठी लागणारी ऊर्जा महागल्याने कंपनीच्या नफ्यावर दबाव आला आहे.
"जियोपॉलिटिकल वास्तव नाकारता येणार नाही"
युनिलिव्हरच्या पर्सनल केअर बिझनेसचे प्रमुख फेबियन ग्रेसिया यांनी कर्मचाऱ्यांना पाठवलेल्या मेमोमध्ये स्पष्ट केले की, "मॅक्रो इकॉनॉमिक आणि भू-राजकीय वास्तवामुळे, विशेषतः मिडल ईस्ट मधील युद्धामुळे पुढील काही महिने मोठी आव्हाने उभी राहिली आहेत. त्यामुळे कंपनीच्या नेतृत्वाने जागतिक स्तरावर 'हायरिंग फ्रीज' करण्याचा निर्णय घेतला आहे."
नोकरकपातीची टांगती तलवार?
युनिलिव्हरने केवळ भरतीच थांबवली नाही, तर खर्चात कपातीची मोहीम आधीच तीव्र केली आहे. २०२४ मध्ये कंपनीने तीन वर्षांत ८० कोटी युरो (सुमारे ९१.६७ कोटी डॉलर) वाचवण्याचे लक्ष्य ठेवले आहे. या खर्च कपातीमुळे जगभरातील सुमारे ७,५०० नोकऱ्यांवर परिणाम होण्याची शक्यता आहे, ज्यात प्रामुख्याने ऑफिसमधील पदांचा समावेश असेल. २०२० मध्ये युनिलिव्हरकडे १.४९ लाख कर्मचारी होते, जे आता कमी होऊन ९६ हजारांवर आले आहेत.
शेअर बाजारात संमिश्र प्रतिसाद
नोकरभरती बंदीच्या या बातमीदरम्यान, सोमवारी लंडन स्टॉक मार्केटमध्ये युनिलिव्हरचे शेअर्स १.१ टक्क्यांनी सावरलेले पाहायला मिळाले. खर्चात कपात करण्याच्या कंपनीच्या निर्णयाचे गुंतवणूकदारांनी स्वागत केल्याचे हे संकेत आहेत.