PF Interest : देशभरातील पगारदार कर्मचाऱ्यांसाठी एक मोठी आनंदाची बातमी आहे! सरकारने २०२४-२५ या आर्थिक वर्षासाठी कर्मचारी भविष्य निर्वाह निधी (EPF) खात्यांमध्ये ८.२५ टक्के व्याजदर वेळापत्रकापूर्वीच जमा केला आहे. ही प्रक्रिया पूर्वीच्या तुलनेत खूपच जलद झाली आहे, कारण पूर्वी ऑगस्ट ते डिसेंबरदरम्यान पीएफ व्याज जमा केले जात होते, पण यावेळी जूनमध्येच ही प्रक्रिया सुरू झाली.
कोट्यवधी खात्यांमध्ये पैसे जमा
केंद्रीय कामगार मंत्री मनसुख मांडविया यांनी दिलेल्या माहितीनुसार, कर्मचारी भविष्य निर्वाह निधी संघटना या आठवड्याच्या अखेरपर्यंत उर्वरित रक्कम जमा करण्याचे काम पूर्ण करेल, ज्यामुळे देशभरातील कोट्यवधी कर्मचाऱ्यांना याचा फायदा मिळेल. याचा अर्थ, जर तुम्ही नोकरी करत असाल आणि तुमचे पीएफ खाते असेल, तर तुमचा नवीनतम व्याज हप्ता एकतर जमा झाला असेल किंवा लवकरच जमा होईल.
मांडविया म्हणाले, "या वर्षी, आर्थिक वर्ष २०२५ साठी ३३.५६ कोटी खाती असलेल्या १३.८८ लाख कंपन्यांसाठी वार्षिक खाते अपडेट्स केले जाणार होते. त्यापैकी, ८ जुलैपर्यंत १३.८६ लाख कंपन्यांच्या ३२.३९ कोटी खात्यांमध्ये ८.२५ टक्के दराने व्याजाचे पैसे जमा झाले आहेत. म्हणजेच, ९९.९ टक्के कंपन्या आणि ९६.५१ टक्के कर्मचाऱ्यांसाठी वार्षिक खाते अपडेट करण्याचे काम पूर्ण झाले आहे."
तुमची पीएफ शिल्लक कशी तपासाल?
तुम्हाला तुमच्या पीएफ खात्यातील जमा झालेले व्याज आणि एकूण शिल्लक तपासण्याचे अनेक सोपे मार्ग आहेत.
ईपीएफओ पोर्टलवरून (EPFO Portal):
- ईपीएफओ पोर्टलवर जा.
- 'Our Service' (आमच्या सेवा) विभागात 'For Employees' (कर्मचाऱ्यांसाठी) या श्रेणीवर क्लिक करा.
- आता 'सदस्य पासबुक' (Member Passbook) निवडा.
- तुमचा UAN नंबर आणि पासवर्ड टाकून लॉगिन करा.
- तुमच्या स्क्रीनवर पीएफ शिल्लक दिसेल.
एसएमएसद्वारे :
- तुमच्या नोंदणीकृत मोबाइल नंबरवरून 'EPFOHO UAN' असे टाइप करा.
- हा मेसेज 7738299899 या क्रमांकावर पाठवा.
- काही वेळातच तुम्हाला पीएफ शिल्लक माहिती एसएमएसद्वारे मिळेल.
उमंग ॲपद्वारे :
- सर्वात आधी UMANG App डाउनलोड करा.
- 'All Services' (सर्व सेवा) निवडा.
- आता 'पासबुक तपासा' (Check Passbook) या पर्यायावर क्लिक करा, तुम्हाला तुमची पीएफ शिल्लक दिसेल.
मिस्ड कॉलद्वारे :
- तुमच्या नोंदणीकृत मोबाइल नंबरवरून ९९६६०४४४२५ या क्रमांकावर मिस कॉल द्या.
- दोन वेळा रिंग वाजल्यानंतर, तुमचा कॉल आपोआप डिस्कनेक्ट होईल.
- काही मिनिटांतच तुम्हाला तुमच्या पीएफ बॅलन्सची माहिती दिली जाईल. या कॉलसाठी कोणतेही शुल्क आकारले जाणार नाही.
वाचा - सोनं-शेअर्स विसरा! चांदीने दिला सर्वाधिक परतावा, किंमत १.११ लाख रुपयांवर, अजून किती वाढणार?
या जलद आणि सोप्या पद्धती वापरून तुम्ही तुमच्या पीएफ खात्याची माहिती तपासू शकता आणि तुमच्या कष्टाच्या पैशांवर मिळालेले व्याज पाहू शकता.