क्रेडिट कार्ड उपयुक्त असतात. त्यामुळे काही काळ व्याजमुक्त वापर करता येतो, बक्षीस गुण मिळतात, विमानतळावरील विश्रांती कक्षांचा लाभ मिळतो, सवलती आणि कधी कधी रोख परतावा देखील मिळतो. योग्य वापर केल्यास क्रेडिट स्कोअर सुधारतो आणि खर्च करणे सोपे होते. मात्र या शुल्कांची रचना समजली नाही, तर क्रेडिट कार्ड हे कर्ज घेण्याचे सर्वांत महाग साधन ठरू शकते.
उशीराने भरण्याचे शुल्क : देय तारखेला रक्कम न भरल्यास बँक दंड आकारते. त्यावर व्याज वेगळेच सुरू राहते. शिवाय वारंवार उशीर झाल्यास ही माहिती क्रेडिट संस्थांकडे पाठवली जाते आणि तुमचा क्रेडिट स्कोअर घसरतो. कमी स्कोअर म्हणजे पुढील कर्जे अधिक महाग.
रोख रक्कम काढणे : अनेकांना वाटते की हे डेबिट कार्डसारखेच असते. तसे नसते. क्रेडिट कार्डवरून रोख रक्कम काढताच लगेच व्याज लागू होते. व्याजमुक्त कालावधी नसतो. त्यावर रोख रक्कम काढण्याचे शुल्कही आकारले जाते. सोयीसाठी मोठी किंमत मोजावी लागते.
परदेशी व्यवहार : बहुतेक क्रेडिट कार्डांवर परदेशी चलन व्यवहारासाठी अतिरिक्त शुल्क आकारले जाते. हे शुल्क विनिमय दराव्यतिरिक्त असते. त्यामुळे परदेशात कार्ड वापरले किंवा ऑनलाइन परदेशी चलनात पैसे दिले, तरी अंतिम बिल अपेक्षेपेक्षा जास्त येते.
वार्षिक शुल्क : अनेक कार्डांवर पहिल्या वर्षी शुल्क माफ असते. पण दुसऱ्या वर्षापासून ठरावीक खर्च न झाल्यास हे शुल्क लागू होते. कार्ड फारसे वापरात नसेल, तर हे शुल्क विनाकारणचा भार ठरते. शिवाय काही हिडन चार्जेसही असतात. त्याचीही माहिती तुमच्याकडे असू द्या.
सर्वांत मोठा सापळा
क्रेडिट कार्ड स्टेटमेंटमध्ये दोन रक्कमा दिसतात. एकूण देय रक्कम आणि त्यापेक्षा खूपच कमी असलेली किमान देय रक्कम. किमान रक्कम भरल्यास खाते थकीत ठरत नाही, पण त्यामुळे व्याज थांबत नाही. उरलेल्या रकमेवर लगेच व्याज लागायला सुरुवात होते. हे व्याज अनेकदा वार्षिक तीस ते चाळीस टक्क्यांपर्यंत असते. हे व्याज दरमहा वाढत जाते. म्हणजे पुढच्या महिन्यात तुम्ही केवळ खर्चावरच नाही, तर मागील महिन्याच्या व्याजावरही व्याज भरत असता. यामुळे अगदी लहान थकबाकीही हळूहळू मोठ्या ओझ्यात बदलते.