Adani Power Share: अदानी समूहाची कंपनी अदानी पॉवर लिमिटेडनं आज, सोमवार, २४ फेब्रुवारी रोजी शेअर बाजाराला मोठी माहिती दिली आहे. अनिल अंबानी यांच्या रिलायन्स पॉवरची उपकंपनी असलेल्या विदर्भ इंडस्ट्रीज पॉवर लिमिटेडच्या (VIPL) समाधान योजनेसाठी कर्जदारांच्या समितीची (COC) मंजुरी मिळाली आहे. विदर्भ इंडस्ट्रीज पॉवर सध्या दिवाळखोरी व दिवाळखोरी संहिता (IBC) २०१६ अंतर्गत कॉर्पोरेट दिवाळखोरी निवारण प्रक्रियेतून (CIRP) जात आहे. आज इंट्राडेमध्ये अदानी पॉवरचा शेअर २ टक्क्यांनी घसरून ४७२.३० रुपयांवर आणि रिलायन्स पॉवरचा शेअर २ टक्क्यांनी घसरून ३६.९६ रुपयांवर व्यवहार करत होता.
काय म्हणाली कंपनी?
कंपनीनं शेअर बाजाराला यासंदर्भातील माहिती दिली. अदानी पॉवरला २४ फेब्रुवारी रोजी रिझोल्यूशन प्रोफेशनल (RP) कडून आशयपत्र (LOI) मिळालं आहे. नागपूरच्या बुटीबोरी येथील एमआयडीसी औद्योगिक क्षेत्रात २ बाय ३०० मेगावॅट (६०० मेगावॅट) क्षमतेचा औष्णिक विद्युत प्रकल्प चालविणाऱ्या व्हीआयपीएलच्या पुनरुज्जीवनाच्या दिशेनं हे महत्त्वाचं पाऊल आहे. संकल्प प्रक्रियेची यशस्वी अंमलबजावणी हेतूपत्रातील अटींच्या अधीन असते. तसंच, त्यासाठी राष्ट्रीय कंपनी कायदा न्यायाधिकरण (एनसीएलटी), मुंबई तसेच संबंधित कायद्यानुसार लागू असलेल्या इतर नियामक प्राधिकरणं, न्यायालयं किंवा न्यायाधिकरणांची मान्यता आवश्यक असल्याचं त्यात सांगण्यात आलंय. औष्णिक वीजनिर्मिती क्षमता वाढवून वीज क्षेत्रात आपले स्थान बळकट करण्याच्या अदानी पॉवरच्या धोरणाचा एक भाग म्हणून व्हीआयपीएलचे अधिग्रहण करण्यात आलंय आहे.
अधिक माहिती काय?
रिलायन्स पॉवरकडून ६०० मेगावॅटचा बुटीबोरी औष्णिक वीज प्रकल्प खरेदी करण्यासाठी अदानी पॉवर चर्चेत असल्याचं वृत्त आहे. हा व्यवहार २४०० ते ३००० कोटी रुपयांच्या घरात असल्याचा अंदाज होता. सप्टेंबर २०२४ मध्ये रिलायन्स पॉवरनं विदर्भ इंडस्ट्रीज पॉवर लिमिटेडचे (व्हीआयपीएल) गॅरंटर म्हणून आपली आर्थिक जबाबदारी पार पाडली होती. कंपनीनं ३,८७२.०४ कोटी रुपयांचं कर्ज फेडलं.
डिसेंबर तिमाहीत अदानी पॉवरचा निव्वळ नफा ७.४ टक्क्यांनी वाढून २,९४० कोटी रुपये झाला आहे. या तिमाहीत कंपनीचा महसूल ५.२ टक्क्यांनी वाढून १३,६७१.२ कोटी रुपये झाला. अदानी पॉवरचे व्याज, कर, अवमूल्यन आणि अमोर्टायझेशन (एबिटडा) पूर्वीचं उत्पन्न आठ टक्क्यांनी वाढून ५,०२३ कोटी रुपयांवर पोहोचलंय आहे. एबिटडा मार्जिन बेस क्वार्टरमधील ३५.८ टक्क्यांवरून ३६.७ टक्क्यांवर पोहोचलंय.
(टीप - यामध्ये केवळ शेअरच्या कामगिरीविषयी माहिती देण्यात आलेली आहे. हा गुंतवणूकीचा सल्ला नाही. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)