UPI Payment : युनिफाइड पेमेंट्स इंटरफेस वापरणाऱ्या कोट्यवधी भारतीयांसाठी एक मोठी आणि आनंदाची बातमी आहे! लवकरच UPI द्वारे व्यवहार करताना तुम्हाला पिन टाकण्याची गरज राहणार नाही. बिझनेस स्टँडर्डच्या अहवालानुसार, नॅशनल पेमेंट्स कॉर्पोरेशन ऑफ इंडिया UPI मध्ये बायोमेट्रिक अपडेट आणण्याची तयारी करत आहे. यानंतर, तुम्ही चेहरा किंवा फिंगरप्रिंट वापरून सहजपणे पेमेंट करू शकाल.
पिन आता पर्यायी होणार, फसवणूक रोखण्यास मदत
या नवीन अपडेटनंतर, UPI द्वारे व्यवहार करताना पिनची आवश्यकता पर्यायी होईल. म्हणजेच, वापरकर्ते हवे असल्यास पिन वापरू शकतील, पण तो अनिवार्य राहणार नाही. मुख्य उद्देश सुरक्षा आणि सोयीमध्ये वाढ करणे हा आहे. देशातील ८० टक्क्यांहून अधिक डिजिटल व्यवहार UPI द्वारे होतात, आणि पिन चोरी तसेच फसवणुकीबद्दल वाढती चिंता लक्षात घेऊन NPCI हे पाऊल उचलत आहे. यामुळे वापरकर्ते पिन टाकण्याऐवजी चेहरा ओळख किंवा फिंगरप्रिंट वापरून व्यवहार प्रमाणित करू शकतील.
१ ऑगस्टपासून UPI चे 'हे' नियम बदलणार
- १ ऑगस्ट २०२५ पासून UPI शी संबंधित आणखी काही महत्त्वाचे नियम बदलणार आहेत, जे तुमच्यासाठी जाणून घेणे आवश्यक आहे.
- बँक बॅलन्स तपासण्यावर मर्यादा: आतापर्यंत तुम्ही कितीही वेळा तुमचा बँक बॅलन्स UPI द्वारे तपासू शकत होता. पण, १ ऑगस्टपासून दिवसातून फक्त ५० वेळाच बॅलन्स तपासण्याची मर्यादा निश्चित करण्यात आली आहे. यामुळे सर्व्हरवरील वाढता भार कमी होईल.
- ऑटो-पे विनंत्यांसाठी वेळ निश्चित: ऑटो-पे (Auto-Pay) च्या विनंत्या आता फक्त सकाळी १० वाजेपूर्वी, दुपारी १ ते ५ वाजेपर्यंत आणि रात्री ९:३० नंतर अशा निश्चित वेळेतच प्रक्रिया केल्या जातील.
- अयशस्वी व्यवहारांची माहिती जलद: आता अयशस्वी व्यवहारांची माहिती तुम्हाला पूर्वीपेक्षा जलद उपलब्ध होईल.
- नवीन बँक खाते लिंक करताना सुरक्षा: नवीन बँक खाते UPI शी लिंक करताना बँकेकडून पुष्टीकरण आवश्यक असेल, ज्यामुळे सुरक्षा आणि पडताळणी प्रक्रिया आणखी मजबूत होईल.
वाचा - PF पेन्शन वाढीवर सरकारचा 'यू-टर्न'? ७,५०० रुपये पेन्शन मिळणार की नाही? संसदेत केलं स्पष्ट
या सर्व बदलांमुळे UPI व्यवहार अधिक सुरक्षित, सोपे आणि कार्यक्षम बनतील अशी अपेक्षा आहे.