PMMY Loan: सरकारकडून मिळणाऱ्या मदतीमुळे स्वतःचा व्यवसाय सुरू करण्याकडे तरुणांचा वाढता कल वाढतोय. आज आम्ही तुम्हाला अशाच एका सरकारी योजनेबद्दल सांगणार आहोत, ज्याद्वारे तुम्ही स्वतःचा व्यवसाय सुरू करू शकता. 'प्रधानमंत्री मुद्रा योजना' (PMMY) असे याचे नाव असून, ही योजना छोट्या उद्योजकांसाठी मोठा आधार ठरत आहे. सरकारच्या माहितीनुसार, गेल्या ११ वर्षांत या योजनेअंतर्गत ५७.७९ कोटी लाभार्थ्यांना कर्ज वितरित करण्यात आले असून, एकूण रक्कम ₹४०.०७ लाख कोटी इतकी आहे.
छोटा व्यवसाय सुरू करणे झाले सोपे
मुद्रा योजनेअंतर्गत बिगर-कृषी आणि बिगर-सरकारी कामांसाठी कोणतीही हमी अथवा तारणाशिवाय जास्तीत जास्त ₹२० लाखांपर्यंत कर्ज मिळते. त्यामुळे छोटा व्यवसाय सुरू करणे किंवा विस्तार करणे अधिक सुलभ झाले आहे.
या योजनेत कर्जाचे चार प्रकार आहेत:
शिशु: ₹५०,००० पर्यंत
किशोर: ₹५०,००० ते ₹५ लाख
तरुण: ₹५ लाख ते ₹१० लाख
तरुण प्लस: ₹१० लाख ते ₹२० लाख
या निधीचा वापर दुकान, डेअरी, कुक्कुटपालन यांसारख्या लघुउद्योगांसाठी करता येतो.
पहिल्यांदाच व्यवसाय सुरू करणाऱ्यांना मोठा आधार
प्रथमच व्यवसाय सुरू करणाऱ्यांसाठी ही योजना विशेष उपयुक्त ठरली आहे. उपलब्ध आकडेवारीनुसार, १२.१५ कोटींहून अधिक नवउद्योजकांना कर्ज देण्यात आले असून, त्याची एकूण रक्कम सुमारे ₹१२ लाख कोटी आहे. केंद्रीय राज्यमंत्री पंकज चौधरी यांनी सांगितले की, या उपक्रमामुळे लघुउद्योजकांना सावकारांवर अवलंबून राहावे लागत नाही आणि कर्जाच्या जाळ्यात अडकण्याचा धोका कमी झाला आहे.
महिलांचा वाढता सहभाग
या योजनेचा सर्वाधिक फायदा महिलांना झाला आहे. एकूण कर्जधारकांपैकी ६७ टक्के महिला आहेत. आतापर्यंत ३८.७१ कोटी कर्जे महिलांना देण्यात आली आहेत. तसेच, ५१ टक्के कर्जे ओबीसी वर्गाला देण्यात आली आहेत. प्रधानमंत्री मुद्रा योजना ही लघु उद्योजकांसाठी प्रभावी आर्थिक साधन ठरत असून, रोजगार निर्मिती आणि स्वावलंबनाला चालना देत आहे. विशेषतः महिला आणि नवउद्योजकांसाठी ही योजना महत्त्वाची ठरत असल्याचे दिसून येते.