आधार कार्ड दाखवा अन् पैसे घेऊन जा! कोणत्याही हमीशिवाय मिळणार ₹८०,००० चे कर्ज...जाणून घ्या

Guarantee Free Govt Loan: गरजू आणि आर्थिकदृष्ट्या कमकुवत लोकांना मदत करण्यासाठी सरकार विविध योजना राबवते. विशेषतः ज्या लोकांना स्वतःचा छोटासा व्यवसाय सुरू करायचा आहे, परंतु पैशांअभावी ते सुरू करू शकत नाहीत, ते मोदी सरकारच्या या योजनेअंतर्गत कर्ज घेऊन काम सुरू करू शकतात. आम्ही ज्या योजनेबद्दल बोलत आहोत, ती पंतप्रधान स्वनिधी योजना(PM Svanidhi Yojna) आहे. ही एक सूक्ष्म-पत योजना असून, यामध्ये सरकार तीन हप्त्यांमध्ये ८०,००० रुपयांचे कर्ज देते. विशेष म्हणजे हे व्यवसाय कर्ज कोणत्याही हमीशिवाय मिळते. 

८० हजारांचे कर्ज तीन हप्त्यांमध्ये मिळणार
जेव्हा देश कोरोना साथीच्या आजाराशी झुंजत होता, लोकांचा रोजगार संकटात आला होता, अशा वेळी नरेंद्र मोदी सरकारने रस्त्यावरील विक्रेत्यांना आर्थिक मदत देऊन त्यांचे जीवनमान पुन्हा सुरू करण्याच्या उद्देशाने पंतप्रधान स्वनिधी योजना सुरू केली. यामध्ये, सरकार गरजूंना तीन हप्त्यांमध्ये ८०,००० रुपयांचे कर्ज देते. यामध्ये, लघु उद्योग सुरू करण्यासाठी तीन टप्प्यात १०, २० आणि ५० हजार रुपये दिले जातात. परंतु या सरकारी योजनेचा पूर्ण फायदा घेण्यासाठी, विश्वासार्हता निर्माण करणे आवश्यक आहे.

स्वनिधी योजनेचा पूर्ण फायदा कसा घ्यावा?
पंतप्रधान स्वनिधी योजनेचा पूर्ण फायदा घेण्यासाठी, लाभार्थ्याने आपली विश्वासार्हता निर्माण करावी लागेल. समजा एखाद्या व्यक्तीला स्वतःचा व्यवसाय सुरू करायचा आहे आणि त्याने या सरकारी योजनेत यासाठी अर्ज केला असेल. तर नियमांनुसार, प्रथम त्याला सरकारकडून १०,००० रुपयांचे कर्ज मिळेल. जर त्याने ही रक्कम निर्धारित वेळेत परत केली, तर त्याला योजनेअंतर्गत आणखी २०,००० रुपयांचे कर्ज मिळू शकते. तेदेखील त्याने वेळेवर परत केल्यानंतर तो ५०,००० रुपयांचे एकरकमी कर्ज मिळविण्यास पात्र मानला जाईल. या रकमेद्वारे, तो त्याचा सुरू केलेला लघु उद्योग पुढे नेऊ शकतो.

फक्त आधार आवश्यक आहे
हे कर्ज कुठल्याही हमीशिवाय मिळते. म्हणजेच, तुम्हाला त्या बदल्यात काहीही गहाण ठेवण्याची गरज नाही. फक्त तुम्हाला सरकारकडून मिळालेले पैसे वेळेत परत करावे लागतील. या योजनेशी संबंधित नियमांकडे पाहिले तर, पंतप्रधान स्वनिधी योजनेअंतर्गत घेतलेली कर्जाची रक्कम एक वर्षाच्या कालावधीत परत करावी लागेल. यात ईएमआय पेमेंटसुविधा देखील उपलब्ध आहे. म्हणजेच, ही रक्कम दरमहा सोप्या हप्त्यांमध्ये परत करता येते. हा लाभ घेण्यासाठी फक्त आधार कार्ड आवश्यक आहे.

कर्जाच्या व्याजावर अनुदान 
मोदी सरकारच्या पंतप्रधान स्वनिधी योजनेअंतर्गत, कर्ज घेणाऱ्यांची संख्या सतत वाढत आहे. अर्जदार जवळच्या कोणत्याही सरकारी बँकेत स्वनिधी कर्जासाठी अर्ज करू शकतो. पडताळणीनंतर तुम्हचे कर्ज मंजूर होते आणि कर्जाची रक्कम तुमच्या बँक खात्यात हस्तांतरित केली जाते. या योजनेत आणखी एक फायदा आहे, तो म्हणजे यामध्ये घेतलेल्या कर्जाच्या व्याजावर वार्षिक ७% दराने अनुदान मिळते.