Credit Card Cash: जर तुम्ही क्रेडिट कार्ड वापरत असाल तर ते शिस्तबद्ध पद्धतीनं वापरणंच उत्तम आहे, अन्यथा तुम्हाला भरमसाठ व्याज द्यावं लागेल. अनेकदा लोक त्याचा वापर पैसे काढण्यासाठी करण्याचाही विचार करतात. पण तसं करण्यापूर्वी आपण ते नीट समजून घेतलं पाहिजे. क्रेडिट कार्डाद्वारे रोख रक्कम काढण्यासाठीही भरमसाठ शुल्क आकारलं जातं. त्यासंदर्भात जाणून घेण्याचा प्रयत्न करुया.
फी किंवा शुल्क
क्रेडिट कार्डवर व्याज आणि शुल्क आकारलं जातं. पण क्रेडिट कार्डमधून पैसे काढणं हा त्याहूनही महागडा सौदा ठरू शकतो. यावरील शुल्क भरमसाठ आहे. यावरील एक शुल्क आहे म्हणजे कॅश अॅडव्हान्स फी. क्रेडिट कार्डचा वापर करून पैसे काढताना प्रत्येक वेळी आकारलं जाणारे हे शुल्क आहे. हे व्यवहाराच्या रकमेच्या २.५% ते ३% पर्यंत आहे, कमीतकमी ₹२५० ते ₹५०० पर्यंत शुल्क आकारलं जातं आणि ते तुमच्या स्टेटमेंटमध्ये दिसून येतं. दुसरं म्हणजे फायनान्स चार्ज. नियमित क्रेडिट कार्ड व्यवहारांवर फायनान्स चार्ज आहे आणि रोख रक्कम काढण्यावर फायनान्स चार्जदेखील आकारला जातो. व्यवहाराच्या तारखेपासून परतफेड होईपर्यंत शुल्क आकारले जातं.
व्याज
व्याज मासिक टक्केवारी दरानं आकारले जाते, सामान्यत: दरमहा २.५% ते ३.५% दर असतो. नियमित व्यवहारांप्रमाणे रोख रक्कम काढण्यासाठी व्याजमुक्त कालावधी नसतो; व्यवहाराच्या दिवसापासून पूर्ण रक्कम मिळेपर्यंत शुल्क सुरू होते. त्यामुळे तुम्ही लवकरात लवकर कॅश अॅडव्हान्सची परतफेड करणं गरजेचं आहे.
एटीएम फी
क्रेडिट कार्ड वापरकर्ता म्हणून, आपल्याला स्थानानुसार दरमहा ५ विनामूल्य एटीएम व्यवहार करण्याची परवानगी असते. त्यानंतर तुमच्याकडून एटीएम मेंटेनन्स किंवा इंटरचेंज फी आकारली जाईल. दोन्ही रकमेत करांचा समावेश नाही. शुल्क आपल्या क्रेडिट कार्डवर आकारलं जाईल आणि आपल्या क्रेडिट कार्ड स्टेटमेंटवर दिसेल.
विलंब शुल्क
जर आपण पूर्ण रक्कम भरली नाही तर थकित रकमेवर विलंब शुल्क आकारलं जातं आणि ते १५% ते ३०% पर्यंत असू शकतं. आपल्या बँकेकडून आकारल्या जाणाऱ्या या शुल्कांबद्दल जागरूक रहा आणि ते देय आहेत की नाही याचा विचार करा. लेट पेमेंट चार्जेसमुळे तुमच्या क्रेडिट स्कोअरवर परिणाम होऊ शकतो.
रोख रक्कम काढण्याची मर्यादा
सहसा, आपण आपल्या क्रेडिट मर्यादेच्या ठराविक टक्के रक्कम रोख म्हणून काढू शकता. काही बँकांमध्ये तुम्ही क्रेडिट लिमिटच्या ४०% रक्कम कॅश अॅडव्हान्स म्हणून काढू शकता.