Maharashtra Weather Update : राज्यात पावसाचा धोका पूर्णपणे टळला असला तरी आता उष्णतेची लाट हळूहळू डोके वर काढत आहे. फेब्रुवारीच्या मध्यावरच उन्हाचा चटका वाढू लागला असून पुढील काही दिवसांत कमाल तापमानात आणखी वाढ होण्याचा अंदाज हवामान विभागाने वर्तविला आहे.(Maharashtra Weather Update)
सकाळी हलका गारवा आणि दुपारी कडक ऊन अशी दुहेरी परिस्थिती सध्या अनुभवायला मिळत आहे.
विदर्भात उष्णतेचा कहर
राज्यात तापमानात झालेली वाढ स्पष्टपणे जाणवत आहे. निफाड येथील गहू संशोधन केंद्रात किमान १२.७ अंश सेल्सिअस तापमानाची नोंद झाली आहे. तर अमरावती येथे हंगामातील उच्चांकी ३६ अंश सेल्सिअस तापमान मोजले गेले आहे.
पुढील काही दिवसांत विदर्भात तापमान ३८ ते ३९ अंशांच्या जवळ जाण्याची शक्यता आहे. कोरडे वारे आणि ढगाळ वातावरणाचा अभाव यामुळे दुपारच्या वेळी उष्णतेच्या तीव्र झळा जाणवतील.
मराठवाड्यात ३८ अंशांपर्यंत पारा
मराठवाड्यातही उन्हाची तीव्रता वाढणार असून कमाल तापमान ३७ ते ३८ अंश सेल्सिअसपर्यंत जाऊ शकते.
दिवसाढवळ्या बाहेर पडताना नागरिकांनी काळजी घेण्याचे आवाहन प्रशासनाकडून करण्यात येत आहे.
कोकण किनारपट्टीत दमट उकाडा
मुंबई, ठाणे, नवी मुंबईसह संपूर्ण कोकण पट्ट्यात उष्ण आणि दमट हवामान राहणार आहे. कमाल तापमान ३५ ते ३६ अंशांच्या दरम्यान राहील. मात्र, आर्द्रतेचे प्रमाण जास्त असल्याने उकाडा अधिक तीव्र जाणवेल.
पश्चिम महाराष्ट्रात सकाळी गारवा, दुपारी उकाडा
पश्चिम महाराष्ट्रात सकाळी व रात्री हलका गारवा (१८ ते २० अंश) जाणवेल. मात्र दुपारी तापमान ३६ ते ३७ अंशांपर्यंत पोहोचणार असल्याने उन्हाचा तडाखा बसू शकतो.
पावसाची शक्यता नाही
हवामान विभागाच्या अंदाजानुसार, पुढील २४ तासांत राज्यात पावसाची कोणतीही शक्यता नाही. आकाश निरभ्र राहणार असल्याने उन्हाची तीव्रता वाढण्याची शक्यता आहे.
नागरिकांसाठी सूचना
* दुपारच्या वेळेत अनावश्यक बाहेर जाणे टाळावे.
* पुरेसे पाणी पिणे.
* डोक्यावर टोपी/छत्री वापरणे.
* शेतकऱ्यांनी पिकांना आवश्यकतेनुसार पाणी द्यावे.
राज्यात पुढील काही दिवस उन्हाचा पारा आणखी वाढण्याची शक्यता असल्याने नागरिकांनी योग्य ती खबरदारी घेणे गरजेचे आहे. तापमान ३९ अंशांच्या उंबरठ्यावर पोहोचण्याची शक्यता असल्याने आरोग्याची विशेष काळजी घेण्याचे आवाहन करण्यात येत आहे.