'मर्चा' पोह्याची बातच न्यारी; GI टॅग मिळताच सर्वत्र चर्चा, चवीने लावलं वेड, खवय्यांचं जिंकलं मन

पश्चिम चंपारणचे हे चविष्ट मर्चा पोहे आता केवळ स्थानिक वारसा राहिलेले नाही तर अलीकडेच मिळालेल्या GI टॅगमुळे याला राष्ट्रीय आणि आंतरराष्ट्रीय स्तरावर मोठी ओळख मिळाली आहे.

पश्चिम चंपारणचे GI टॅग मिळालेले 'मर्चा पोहे' मकर संक्रांतीनिमित्त अनेकांचा आवडता खाद्यपदार्थ आहे. पश्चिम चंपारणचे हे चविष्ट मर्चा पोहे आता केवळ स्थानिक वारसा राहिलेले नाही तर अलीकडेच मिळालेल्या GI टॅगमुळे याला राष्ट्रीय आणि आंतरराष्ट्रीय स्तरावर मोठी ओळख मिळाली आहे. आपल्या विशिष्ट सुगंधासाठी आणि चवीसाठी प्रसिद्ध असलेले हे पोहे मकर संक्रांतीच्या काळात मुख्य आहार मानले जातात.

GI टॅगमुळे मर्चा पोह्याची मागणी वाढली

नोव्हेंबर २०२३ मध्ये GI टॅग मिळाल्यापासून, मकर संक्रांतीच्या जानेवारी महिन्यात पश्चिम चंपारणमधून येणाऱ्या या सुवासिक मर्चा पोह्याच्या मागणीत मोठी वाढ झाली आहे. याची मागणी केवळ स्थानिक पातळीवरच नाही, तर मुंबई, गुजरात, हैदराबाद, दिल्ली यांसारख्या प्रमुख शहरांसह जगभरातून वाढली आहे. पश्चिम चंपारण जिल्ह्यातील रामनगर, गौनाहा, मैनाटांड, चनपटिया, नरकटियागंज आणि लौरिया या भागांत हे पीक मोठ्या प्रमाणावर घेतले जाते.

किमतीत वाढ, तरीही ग्राहकांची पसंती

किराणा व्यावसायिक राजेश गुप्ता यांनी सांगितलं की, हे पोहे वर्षभर विकले जातात, पण मकर संक्रांतीच्या काळात त्याला सर्वाधिक मागणी असते. ते म्हणतात, "याचा घाऊक भाव पूर्वी ५०-७० रुपये प्रति किलो होता, जो आता वाढून ९०-११० रुपये झाला आहे. तर किरकोळ बाजारात याची विक्री १५० रुपये प्रति किलोपर्यंत होत आहे. हे पोहे १ किलो आणि ५ किलोच्या पॅकेटमध्ये विकला जातो."

मुनीलाल प्रसाद या ग्राहकाने आपला अनुभव सांगताना म्हटलं की, "तीन वर्षांपूर्वी दिल्लीहून आमचे नातेवाईक बिहारमधील बगहा येथे आले होते. आम्ही त्यांना दही आणि गुळासोबत मर्चा पोहे खायला दिले. त्यांना याची चव आणि सुगंध इतका आवडला की, आता ते दरवर्षी मकर संक्रांतीला १० ते १५ किलो पोहे दिल्लीला मागवून घेतात."

 पोहे अतिशय मऊ आणि चविष्ट

रामनगरचे शेतकरी विजय तिवारी यांनी माहिती दिली की, पश्चिम चंपारणमध्ये मर्चाची लागवड १,००० हेक्टरवरून ३,००० हेक्टरपर्यंत वाढली आहे. उत्तम भाव आणि वाढत्या मागणीमुळे शेतकरी याकडे वळले आहेत. कृषी शास्त्रज्ञ विनय कुमार यांनी स्पष्ट केले की, मर्चा तांदूळ हा बासमतीचा प्रकार नसून, तो लहान दाण्याचा एक सुवासिक तांदूळ आहे. या तांदळाच्या रोपात, दाण्यांमध्ये आणि त्यापासून बनणाऱ्या पोह्यांमध्ये एक वेगळाच सुगंध असतो. यापासून बनलेले पोहे अतिशय मऊ आणि चविष्ट असतात.