प्रेमासाठी ओलांडल्या देशासह धर्माच्या सीमा; पाकिस्तानी तरुणावर जडला भारतीय महिलेचा जीव

पाकिस्तानात प्रवेश केलेल्या एका भारतीय शीख महिलेने इस्लाम धर्म स्वीकारला आहे.

तीर्थयात्रा करणाऱ्या एका ग्रुपसह पाकिस्तानात प्रवेश केलेल्या एका भारतीय शीख महिलेने इस्लाम धर्म स्वीकारला आहे. सोशल मीडियावर भेट झालेल्या एका स्थानिक मुस्लिम पुरूषाशी लग्न केल्याची माहिती लाहोर पोलिसांनी दिली. पंजाबमधील कपूरथळा जिल्ह्यातील पोलिसांनी दिलेल्या माहितीनुसार, भारतातील पंजाब राज्यात तिच्या बेपत्ता प्रकरणाची चौकशी केली जात आहे. गुरु नानक देव यांच्या जयंतीशी संबंधित कार्यक्रमांना उपस्थित राहण्यासाठी वाघा सीमेवरून पाकिस्तानला गेली. २००० भारतीय शीख यात्रेकरूंमध्ये सरबजीत कौरचा समावेश होता. १३ नोव्हेंबर रोजी यात्रेकरू भारतात परतले, परंतु सरबजीत कौर परतली नाही.

लाहोरच्या एका वरिष्ठ पोलिस अधिकाऱ्याने पीटीआयला सांगितलं की, "पाकिस्तानमध्ये आल्यानंतर ४ नोव्हेंबर रोजी सरबजीत कौरने लाहोरपासून सुमारे ५० किलोमीटर अंतरावर असलेल्या शेखुपुरा जिल्ह्यातील रहिवासी नासिर हुसेनशी निकाह केला आणि तिने स्वतःच्या इच्छेने इस्लाम धर्म स्वीकारला आहे. हे कपल सध्या लपून बसलं आहे आणि पोलीस त्यांचा शोध घेत आहेत." गुप्तचर यंत्रणांनी या जोडप्याला ताब्यात घेतलं आहे का? असं विचारले असता, त्यांनी कोणतीही प्रतिक्रिया देण्यास नकार दिला

सोशल मीडियावर व्हायरल होत असलेल्या एका व्हिडिओमध्ये कौर म्हणाली की, ती नासिर हुसेनवर "प्रेम" करते आणि गेल्या नऊ वर्षांपासून सोशल मीडियाद्वारे त्याला ओळखते. तिचा तलाक झाला असून तिला आता नासिरसोबत निकाह करायचा आहे. व्हिडिओमध्ये कौर न्यायिक दंडाधिकारी मुहम्मद खालिद महमूद वॉरैच यांच्या न्यायालयात सांगत आहे की, कोणीही तिचं अपहरण केले नाही आणि ती नासिर हुसेनसोबत आनंदात आहे. तिने भारतातून काहीही सोबत आणलेले नाही.

कौर ही भारतातील कपूरथळा जिल्ह्यातील अमनीपूर गावची रहिवासी आहे. ती बेपत्ता झाल्याची चौकशी पंजाब राज्यात सुरू आहे. पोलिसांनी दिलेल्या माहितीनुसार, कौरकडे जानेवारी २०२४ मध्ये भारतातील जालंधर येथील प्रादेशिक पासपोर्ट कार्यालयाने जारी केलेला पासपोर्ट होता. तपास सुरू आहे, परंतु तिच्या धर्मांतराबद्दल कोणतीही माहिती नाही. कौरविरुद्ध फसवणूक आणि फसवणुकीचे तीन गुन्हे दाखल करण्यात आले आहेत.