रोज जेवण झाल्यावर चघळा १ छोटीशी लवंग, पचनाच्या तक्रारींनी दुखणार नाही पोट आणि डोकंही..

लवंग अगदी इवलीशी दिसत असली तरी तिच्यामध्ये भरपूर पौष्टिक घटक अगदी ठासून भरलेले आहेत. त्यामुळेच जेवणानंतर एक लवंग सावकाशपणे चघळत खाणं अतिशय गरजेचं आहे.

लवंग खाल्ल्याने बघा शरीराला नेमके कोणते फायदे होऊ शकतात.. हे फायदे जर जाणून घेतले तर तुम्हीही दररोज न चुकता १ लवंग आठवणीने तोंडात टाकाल..

जेवण झाल्यानंतर बऱ्याचदा रक्तातील साखर वाढते. त्याचा परिणाम आपल्या एनर्जी लेव्हलवर होतोच. पण जेवणानंतर जर एखादी लवंग खाल्ली तर मात्र रक्तातील साखर वाढत नाही. ती नियंत्रित राहाते. त्यामुळे मधुमेह असणाऱ्या व्यक्तींसाठीही लवंग खाणं जास्त फायदेशीर आहे.

लवंगमध्ये असणारे काही घटक रोगप्रतिकारक शक्ती वाढविण्यासाठी मदत करतात. त्यामुळे इम्युनिटी कमी असल्याने जे लोक वारंवार आजारी पडतात, त्यांनी काही दिवस नियमितपणे लवंग खाऊन पाहावी.

चयापचय क्रिया उत्तम राहण्यासाठीही लवंग मदत करते. त्यामुळे पचन चांगले होऊन शरीरावर अतिरिक्त चरबी जमा होत नाही.

दात आणि हिरड्यांचं आरोग्य उत्तम राहण्यासाठीही लवंग अतिशय उपयुक्त ठरते. शिवाय दात किडण्याचा धोकाही लवंग नियमितपणे खाल्ल्यास कमी होऊ शकतो.

काही दिवस लवंग नियमितपणे खाऊन पाहा आणि आरोग्यावर काय परिणाम होतो ते अनुभवा असं फिटनेस आणि डाएट ट्रेनर गुरजीत सिद्धू यांनी सोशल मीडियावर सांगितले आहे.