भयंकर! २ वर्षांच्या मुलाने किसमुळे गमावली दृष्टी, आईनेच सांगितला घडलेला धक्कादायक प्रकार

एका आईने सर्व पालकांना सतर्क केलं आहे. तिच्यासोबत घडलेला अत्यंत वेदनादायक अनुभव शेअर केला आहे. महिलेच्या दोन वर्षांच्या मुलाने एका व्हायरसमुळे आपल्या एका डोळ्याची दृष्टी गमावली आहे. हा व्हायरस एका किसद्वारे पसरल्याचं म्हटलं जात आहे. या घटनेने हे कुटुंब उद्ध्वस्त झालं असून आता ते नातेवाईक आणि मित्रांना लहान मुलांना किस करू नका असा सल्ला देत आहेत. 

ज्युवान नावाच्या या चिमुकल्याच्या डोळ्यात 'हर्पिस सिंप्लेक्स व्हायरस'चा (Herpes Simplex Virus) संसर्ग झाल्यानंतर त्याचं आयुष्य बदलून गेलं. सुरुवातीला एक साधा संसर्ग वाटणाऱ्या या गोष्टीने नंतर भीषण रूप धारण केलं. या व्हायरसमुळे त्याच्या डोळ्यामध्ये फोड आला, ज्याचं रूपांतर नंतर बुबुळातील ४ मिमीच्या छिद्रात झालं. अनेक आठवड्यांच्या उपचारानंतरही डॉक्टर त्याच्या त्या डोळ्याची दृष्टी वाचवू शकले नाहीत.

या चिमुकल्याचा हा संघर्ष गेल्या वर्षी ऑगस्टमध्ये सुरू झाला, जेव्हा तो केवळ १६ महिन्यांचा होता. त्याला डोळ्याला सामान्य संसर्ग झाला असावा असं समजून डॉक्टरांनी अँटीबायोटिक्स देऊन घरी पाठवले. मात्र, नामिबियात राहणाऱ्या त्याच्या आईला, मिशेल सायमनला, काहीतरी गंभीर असल्याचं जाणवलं.

मिशेलने फेसबुकवर लिहिलं की, "दोन दिवसांनंतर आमच्या लक्षात आलं की डोळ्यात काहीतरी गंभीर समस्या आहे. त्याच्या डोळ्याच्या आत काहीतरी वाढत असल्यासारखं दिसत होतं. आम्हाला जाणवलं की त्याच्या डोळ्यातील संवेदना संपली आहे, कारण तो स्वतःचं बोट डोळ्यात घालून बुबुळ बाहेर काढत होता, पण त्याला वेदनाच होत नव्हत्या. आपल्या बाळाच्या डोळ्यात ४ मिमीची उघडी जखम पाहणं हा अत्यंत क्लेशदायक अनुभव होता."

पुढील तपासणीत असं निष्पन्न झाले की, 'हर्पिस सिंप्लेक्स व्हायरस'मुळे त्याच्या डोळ्यात 'कोल्ड सोर' (फोड) झाला आहे. आई-वडील दोघांचीही टेस्ट निगेटिव्ह आल्यामुळे हा व्हायरस अशा व्यक्तीकडून पसरला असावा ज्याला स्वतःला हर्पिसचा फोड होता आणि त्याने बाळाला किस केलं होतं.

या निदानाबद्दल बोलताना तिने 'मेट्रो यूके'ला सांगितलं की, "डॉक्टर जेव्हा मला हे सांगत होते, तेव्हा मला वाटलं की हा १ एप्रिलचा एखादा थट्टा-मस्करीचा प्रकार आहे का? कारण मला त्यावर विश्वासच बसत नव्हता." जोपर्यंत संसर्ग नियंत्रणात आला, तोपर्यंत कायमस्वरूपी नुकसान झालं होतं. "हर्पिसने त्याच्या बुबुळाचं इतकं नुकसान केलं होतं की त्याने डोळ्यातील सर्व संवेदना गमावल्या आणि त्याला काहीही दिसेनासे झाले. तो पूर्णपणे अंध झाला होता."

"याचा अर्थ असा की मेंदूने त्या डोळ्याला ओळखणं बंद केलं आणि सिग्नल पाठवणं थांबवलं. डोळ्याचं संरक्षण करणारा जेलचा थर सुकला आणि डोळा कोरडा पडला." डोळ्याच्या संरक्षणासाठी डॉक्टरांनी आता त्याच्या पापण्या शिवल्या आहेत. हे कुटुंब आता दक्षिण आफ्रिकेत एका गुंतागुंतीच्या 'नर्व्ह ट्रान्सफर' शस्त्रक्रियेसाठी तयारी करत आहे, जेणेकरून भविष्यात बुबुळ प्रत्यारोपण (Cornea Transplant) शक्य होईल.

तिने पुढे म्हटले, "दृष्टी परत येईल की नाही हे या टप्प्यावर माहित नाही, पण तो त्याच्या डाव्या डोळ्याने कायमचा अंध असू शकतो हे आम्ही स्वीकारलं आहे. आमचे मुख्य प्राधान्य आता फक्त तो डोळा वाचवणं आणि पुढील संसर्ग रोखणं हे आहे." आपला अनुभव सांगताना ती म्हणाली, "कोणाच्याही बाळाला का किस करू नये, हे लोकांना समजावून सांगणं मला आवश्यक वाटते."

"मी याबद्दल हजार वेळा वाचलं होतं, पण आम्ही कधीच गांभीर्याने घेतलं नाही. मला वाटलं की वाईटात वाईट काय होईल? पण मी चुकीची होते. अशा एका साध्या व्हायरसने इतका मोठा आघात आणि नुकसान केलं आहे की, हा धोका पत्करणं अजिबात योग्य नाही. कोणालाही तुमच्या लहान बाळाला किस करू देऊ नका."