बुलंदशहरचे राजकुमार वर्मा यांची लेक गायत्री वर्मा हिने उत्तर प्रदेश लोकसेवा आयोगाची (UPPSC) परीक्षा उत्तीर्ण होऊन पीसीएस (PCS) अधिकारी होण्याचा मान मिळवला आहे. गायत्रीने आपल्या तिसऱ्या प्रयत्नात २१० वा रँक मिळवून हे मोठं यश मिळवलं. तिने बारावीपर्यंतचे शिक्षण बुलंदशहरमध्ये पूर्ण केलं, तर पदवीचे शिक्षण अलिगढ येथील आपल्या मामाच्या गावी राहून पूर्ण केलं.
आर्थिक परिस्थिती बेताची असतानाही गायत्रीने ऑनलाईन माध्यमातून अभ्यास केला आणि सोशल मीडियापासून स्वतःला दूर ठेवलं. हे यश तिच्या वडिलांच्या कष्टाचं आणि कुटुंबाच्या अढळ विश्वासाचं फळ आहे, ज्यामुळे आज संपूर्ण परिसराचं नाव उंचावलं आहे.
गायत्रीचे वडील राजकुमार एका साध्या दुकानात टायर पंक्चर काढण्याचं काम करतात. घरची आर्थिक स्थिती इतकी हलाखीची होती की, पंक्चरच्या दुकानातून होणाऱ्या २००-४०० रुपयांच्या कमाईवर उदरनिर्वाह करणं कठीण होतं. त्यासाठी त्यांना सोबत चहाची टपरीही टाकावी लागली.
अनेकदा मुलीच्या शिक्षणाची फी भरण्यासाठी त्यांना व्याजाने पैसे उधार घ्यावे लागले. आपल्या मुलीने आता पूर्ण प्रामाणिकपणे काम करावं आणि तिने स्वतः भ्रष्टाचार करू नये व इतरांनाही करू देऊ नये, असं मत तिच्या वडिलांनी व्यक्त केलं आहे. सध्या त्यांच्या घरी शुभेच्छा देणाऱ्यांची रांग लागली आहे.
गायत्रीचा यशाचा प्रवास सोपा नव्हता. पहिल्या प्रयत्नात ती प्रीलिम्स उत्तीर्ण होऊ शकली नव्हती, पण तिच्या आईने दिलेल्या धैर्यामुळे ती पुन्हा उभी राहिली. दुसऱ्या प्रयत्नात ती मुख्य परीक्षेपर्यंत पोहोचली, पण अंतिम निवड होऊ शकली नाही.
अखेर तिसऱ्या प्रयत्नात तिने आपल्या मेहनतीच्या जोरावर २१० वा रँक मिळवला. आज तिच्या घरी ढोल-ताशांचा गजरात, फुलांचे मोठे घालून, आरती करून तिचं आनंदात स्वागत केलं जात आहे. जिद्द आणि मेहनत खरी असेल तर कोणतीही परिस्थिती अडथळा ठरू शकत नाही, हे गायत्रीने सिद्ध करून दाखवलं आहे.