इडली हा अनेकांचा आवडीचा पदार्थ. बऱ्याचदा असं होतं की नाश्त्याला इडलीचा बेत आखला जातो. पण सांबार करण्याएवढा वेळच मिळत नाही. मग अशावेळी झटपट चटणी केली जाते आणि इडली चटणीवर ताव मारला जातो. पण बऱ्याच जणांचं असं म्हणणं असतं की दक्षिणेत किंवा उडपी हॉटेलमध्ये जशी हिरवी चटणी मिळते, तशी चव काही घरच्या चटणीला येत नाही. असं तुमचंही म्हणणं असेल तर पुढे सांगितलेली नीर चटणी रेसिपी एकदा ट्राय करून पाहा (South Indian Special Neer Chutney Recipe). ही चटणी अतिशय चवदार होते आणि शिवाय ती करण्यासाठी खूप काही तयारी करण्याची गरजही नसते.(how to make neer chutney with idli?)
इडलीसोबत खाण्यासाठी नीर चटणी रेसिपी
साहित्य
अर्धी वाटी डाळवं
अर्धी वाटी नारळाचे काप
पाव वाटी भाजलेले शेंगदाणे
३ ते ४ हिरव्या मिरच्या आणि २ ते ३ लसूण पाकळ्या
२ टेबलस्पून बारीक चिरलेली कोथिंबीर
फोडणीसाठी तेल, मोहरी, जिरे, हिंग, कडिपत्ता आणि उडीद डाळ
कृती
नीर चटणी करण्यासाठी सगळ्यात आधी शेंगदाणे थोडे भाजून घ्या आणि त्यांची सालं काढून घ्या.
यानंतर मिक्सरच्या भांड्याामध्ये हिरव्या मिरच्यांचे तुकडे, डाळवं, नारळाचे काप , लसूण, भाजलेले शेंगदाणे असं सगळं घाला आणि अगदी बारीक चटणी वाटून घ्या.
यानंतर त्यात थोडं पाणी आणि बारीक चिरलेली कोथिंबीर घाला आणि पुन्हा एकदा सगळं मिक्सरमधून फिरवून घ्या. नंतर या चटणीमध्ये चवीनुसार मीठ घालून वरतून मोहरी, जिरे, हिंग, कडिपत्ता आणि उडीद डाळ यांची कडकडीत फोडणी घाला. नीर चटणी झाली तयार. या चटणीसोबत एकदा इडली खाऊन पाहा. चव अशी भारी होईल की तुम्हाला सांबारचीही आठवण येणार नाही.