झगमगाटाच्या जगात 'कंफर्ट फूड'चा विजय; न्यू इयरच्या रात्री फूड अँपवर ९,४१० लोकांची 'खिचडी'ला पसंती 

न्यू इयरच्या रात्री पिझ्झा, पास्ता यांसारख्या फँन्सी फूडला बाजूला सारून खिचडीला प्राधान्य देणाऱ्या ग्राहकांचा नवा दृष्टिकोन समोर आला आहे; कसा ते पाहू. 

नवीन वर्षाची पूर्वसंध्या म्हटली की डोळ्यांसमोर काय येते? डीजेचा दणदणाट, रोषणाई आणि हॉटेलबाहेर लागलेल्या लांबच लांब रांगा. 'न्यू इयर सेलिब्रेशन' म्हणजे काहीतरी जड, मसालेदार आणि चमचमीत  खाणे असेच एक समीकरण बनले आहे. पण यंदाच्या ३१ डिसेंबरने एका वेगळ्याच मानसिकतेचे दर्शन घडवले आहे.

प्यारी खिचडीला मागणी : 

प्रसिद्ध फूड डिलिव्हरी ॲप 'स्विगी' (Swiggy) ने नुकतीच एक थक्क करणारी आकडेवारी जाहीर केली. ३१ डिसेंबरच्या रात्री, जेव्हा संपूर्ण जग पार्टीच्या मूडमध्ये होते, तेव्हा चक्क ९,४१० लोकांनी खिचडीची ऑर्डर दिली! हो, तुम्ही बरोबर वाचलेत. ज्या रात्री लोक 'चीझ' आणि 'स्पाइस' शोधत होते, त्याच रात्री हजारो घरांमध्ये साधी, मऊ आणि पचायला हलकी खिचडी पोहोचत होती.

स्विगीने आपल्या अधिकृत 'X' (ट्विटर) हँडलवर गंमतीने म्हटले की, "आजच्या दिवशीही ९,४१० लोक खिचडी ऑर्डर करत आहेत. हे लोक कदाचित रात्री १० वाजेपर्यंत शांतपणे झोपूनही जातील!" ही पोस्ट वाचून अनेकांच्या चेहऱ्यावर हसू आले, पण त्यामागे एक खूप मोठा विचार दडलेला आहे.

केवळ खिचडीच नाही तर...

या 'कंफर्ट फूड'च्या शर्यतीत खिचडी एकटी नव्हती. आकडेवारीनुसार:

४,२४४ लोकांनी 'उपमा' मागवला: नाश्त्याचा हा साधा प्रकार रात्रीच्या जेवणासाठी निवडणारेही कमी नव्हते.

१,९२७ बेंगळुरूकरानी मागवले 'सॅलड': देशाची आयटी राजधानी असलेल्या बेंगळुरूमध्ये लोकांनी आरोग्याला प्राधान्य देत सॅलडवर ताव मारला.

झगमगाटात शांततेचा शोध

हा कल (Trend) काय दर्शवतो? कदाचित आजची तरुण पिढी आता 'दिखाव्या'पेक्षा 'स्वतःच्या समाधानाला' जास्त महत्त्व देऊ लागली आहे. ३१ डिसेंबर म्हणजे केवळ गोंगाट नाही, तर स्वतःसोबत घालवलेला शांत वेळही असू शकतो. बाहेरच्या जगात कितीही गोंधळ असला, तरी घरी बसून आपल्या आवडत्या उबदार (Comfort Food) अन्नाचा घास घेणं, यातही एक वेगळं सुख आहे.

पार्टी करणं चुकीचं नाही, पण ज्यांना खिचडी हवी होती, त्यांनी ती मागवली आणि कदाचित नवीन वर्षाचं स्वागत अधिक शांतपणे आणि आनंदाने केलं असेल. शेवटी, नवीन वर्षाची सुरुवात जड पोटाने करण्यापेक्षा हलक्या आणि तृप्त मनाने केलेली कधीही चांगलीच, नाही का?