महाराष्ट्रीयन उपवासाच्या पदार्थांमध्ये साबुदाणा खिचडीला महत्त्वाचे स्थान आहे. पण अनेकांची तक्रार असते की खिचडी चिकट होते किंवा साबुदाणा कच्चा राहतो (How To Make Sabudana Khichdi). साबुदाणा खिचडी मऊ आणि मोकळी करण्यासाठी खालील महत्त्वपूर्ण टिप्सचा अवलंब करा. ज्यामुळे घरी केलेली खिचडीसुद्धा परफेक्ट होईल. (Sabudana Khichdi Making Tips)
साबुदाणा खिचडी परफेक्ट कशी करावी?
खिचडी चांगली होण्यासाठी सर्वात महत्त्वाची पायरी म्हणजे साबुदाणा भिजवणे. साबुदाणा प्रथम दोन-तीन वेळा स्वच्छ पाण्याने धुवून घ्या. साबुदाणा जेवढा असेल, त्याच्या अगदी वरपर्यंत (फक्त अर्धा इंच) पाणी घाला. जास्त पाणी घातल्यास साबुदाणा चिकट होतो.
साबुदाणा कमीत कमी ६ ते ८ तास किंवा रात्रभर भिजवा. भिजल्यानंतर साबुदाणा मोकळा झाला पाहिजे आणि बोटांनी दाबल्यावर लगेच तुटला पाहिजे. दाण्यांचा कूट आणि त्याचे मिश्रण यामुळे खिचडीला उत्तम चव आणि मोकळेपणा येतो. साबुदाण्याच्या १/३ प्रमाणात भाजलेल्या शेंगदाण्याचा भरड कूट वापरा. (उदा. १ वाटी साबुदाणा तर १/३ वाटी कूट). कूट एकदम बारीक (पावडर) नसावा, थोडा जाडसर ठेवा.
कूट, मीठ (उपवासाचे), आणि साखर (पर्यायी) हे सर्व पदार्थ साबुदाणा शिजवण्यापूर्वी मिक्स करून घ्या. यामुळे मीठ आणि शेंगदाणा कूट साबुदाण्याला एकसारखा लागतो आणि शिजवल्यावर साबुदाणा चिकटत नाही. खिचडी मोकळी ठेवण्यासाठी शिजवण्याची पद्धत महत्त्वाची आहे. कढईत मध्यम आचेवर फक्त १-२ चमचे तेल किंवा तूप गरम करा.
जिरे (उपवासाला चालत असल्यास) आणि बारीक चिरलेली मिरची घालून परतवून घ्या. साबुदाणा मिश्रणात हळूवारपणे घाला आणि मध्यम आचेवर शिजवा. खिचडी सतत चमच्यानं हलवू नका. २-३ मिनिटांच्या अंतराने हलक्या हाताने एकदाच हलवा. साबुदाणा पारदर्शक (Translucent) दिसायला लागला की गॅस बंद करा.
गॅस बंद केल्यावर लगेच खाऊ नका. गरम खिचडीवर झाकण ठेवून तिला ५ मिनिटे वाफेत मुरू द्या. यामुळे खिचडीतील ओलावा संतुलित राहतो आणि साबुदाणा पूर्णपणे मऊ होऊन मोकळा होतो. या सोप्या टिप्स वापरून तुम्ही प्रत्येक वेळी मऊ, मोकळी आणि चविष्ट साबुदाणा खिचडी सहज बनवू शकता.