चेहरा साफ, स्वच्छ आणि ताजातवाना ठेवण्यासाठी वाफ घेणे हा एक सोपा, घरच्या घरी करता येणारा पर्याय आहे. योग्य पद्धतीने वाफ घेतली तर त्वचेवरील घाण, तेलकटपणा आणि बंद झालेले रोमछिद्र (पोअर्स) स्वच्छ होण्यास मदत होते. (Do you think steaming your face makes your face beautiful? See the correct way to steam)मात्र वाफ घेताना काही गोष्टींची काळजी घेणे खूप गरजेचे असते.
वाफ घेण्यापूर्वी चेहरा साध्या फेसवॉशने किंवा पाण्याने स्वच्छ करुन घ्यावा. यामुळे बाहेरची धूळ, मेकअप किंवा घाम निघून जातो आणि वाफ थेट त्वचेवर चांगल्या प्रकारे काम करते. चेहरा स्वच्छ नसेल तर वाफेमुळे घाण अधिक आत शिरण्याची शक्यता असते.
वाफ नेहमी मध्यम तापमानाची घ्यावी. फार गरम वाफ त्वचेसाठी हानिकारक ठरू शकते. त्यामुळे पाणी उकळल्यानंतर थोडे थांबून मग वाफ घ्यावी. चेहरा पाण्याच्या भांड्यापासून थोड्या अंतरावर ठेवावा, अगदी जवळ नेऊ नये. डोक्यावर टॉवेल घेऊन वाफ घेतल्यास वाफ बाहेर जात नाही आणि परिणाम चांगला दिसतो.
वाफ घेताना वेळेचे भान ठेवणे महत्त्वाचे आहे. साधारण ५ ते ८ मिनिटे वाफ घेणे पुरेसे असते. जास्त वेळ वाफ घेतल्यास त्वचा कोरडी पडू शकते किंवा लालसर होऊ शकते. आठवड्यातून १ ते २ वेळाच वाफ घेणे योग्य ठरते, रोज वाफ घेणे टाळावे.
वाफ घेतल्यानंतर त्वचेची काळजी घेणे तितकेच गरजेचे असते. वाफेमुळे रोमछिद्र उघडतात, त्यामुळे चेहरा हलक्या हाताने पुसून थंड पाण्याने धुवावा. यामुळे पोअर्स बंद होण्यास मदत होते. त्यानंतर त्वचेच्या पोतानुसार हलका मॉइश्चरायझर लावावा. जेणेकरुन त्वचेत ओलावा टिकून राहील.
संवेदनशील किंवा खूप कोरडी त्वचा असेल तर वाफ घेताना अधिक काळजी घ्यावी. अशा त्वचेसाठी कमी वेळ वाफ घेणे योग्य ठरते. जर चेहऱ्यावर जळजळ, जास्त लालसरपणा किंवा खाज जाणवली तर वाफ लगेच थांबवावी. तज्ज्ञांच्या सल्यानेच हा उपाय करावा.
योग्य पद्धतीने आणि मर्यादित प्रमाणात वाफ घेतल्यास चेहरा स्वच्छ, मऊ आणि उजळ दिसण्यास मदत होते. नियमित स्किन केअरसोबत वाफ घेण्याची ही सवय लावली तर त्वचेचे आरोग्य चांगले राखता येते.