नरेंद्र मेहतांना कोर्टाचा दिलासा; विरोधातील याचिका फेटाळली

मीरा-भाईंदर मतदारसंघाचे भाजपचे आमदार नरेंद्र मेहता यांच्या निवडणुकीला आव्हान देणारी नयना वसानी यांची याचिका उच्च न्यायालयाने मंगळवारी फेटाळली.

लोकमत न्यूज नेटवर्क, मुंबई :मीरा-भाईंदर मतदारसंघाचे भाजपचे आमदार नरेंद्र मेहता यांच्या निवडणुकीला आव्हान देणारी नयना वसानी यांची याचिका उच्च न्यायालयाने मंगळवारी फेटाळली. मेहता यांचा उमेदवारी अर्ज कशाप्रकारे चुकीच्या पद्धतीने स्वीकारण्यात आला, हे नयना सिद्ध करू शकल्या नाहीत, असे निरीक्षण न्यायालयाने नोंदविले.

नरेद्र मेहता यांनी उमेदवारी अर्ज भरताना सादर केलेल्या प्रतिज्ञापत्रात अपुरी माहिती भरली आहे. त्यांनी त्यांच्यावर असलेल्या फौजदारी गुन्ह्यांचा, त्यांच्या नावे असलेले शेअर्स, सरकारची थकबाकी तसेच उत्पन्नाचा स्रोताची माहिती दिली नाही, असा आरोप नयना वसानी यांनी याचिकेद्वारे केला होता. मात्र, नरेंद्र मेहता यांनी याचिकेतील आरोप फेटाळले. 

आपल्याविरोधात दाखल केलेल्या दोन गुन्ह्यांपैकी एका गुन्ह्यात ‘ए समरी’ रिपोर्ट दाखल करण्यात आला, तर दुसरा गुन्हा अदखलपात्र आहे. आपल्यावर आरोप निश्चित करण्यात आले नाहीत. तसेच कोणतीही सरकारी थकबाकी नाही, असे मेहता यांच्या वकिलांनी न्यायालयाला सांगितले.मात्र, मेहता यांनी ‘ए समरी रिपोर्ट’ मागे घेतल्याची माहिती न्यायालयाला दिली नाही, असे नयना यांनी न्यायालयाला सांगितले.  

वकिलांचा दावा काय?

मेहता यांच्याविरोधात दाखल केलेली याचिका सर्वोच्च न्यायालयाने अनेक प्रकरणांत दिलेल्या निकालानुसार  निकषांत बसणारी नाही, असा दावा मेहता यांच्या वकिलांनी केला. यावर याचिकाकतर्तीला नेमकेपणाने काहीही स्पष्ट करता आले नाही, असे म्हणत न्या. शर्मिला देशमुख यांच्या एकलपीठाने वसानी यांची  याचिका फेटाळली.