पेट्रोल पंपावर घातली अंगठी, पूजा-सोहमचं अनोखं प्रपोजल; मुलाखतीत सांगितला किस्सा

पूजा-सोहमच्या प्रपोजलची फिल्मी गोष्ट तुम्हाला ठाऊक आहे का?

अभिनेत्री पूजा बिरारी आणि अभिनेता सोहम बांदेकर यांचं काहीच दिवसांपूर्वी लग्न झालं. त्यांच्या लग्नाला सिनेसृष्टीतील तारे तारका उपस्थित होते. २ डिसेंबर २०२५ रोजी लोणावळ्यात शाही थाटात विवाहबद्ध झालेल्या या जोडप्याच्या लग्नाचे फोटो आणि रिसेप्शनचे व्हिडीओ सोशल मीडियावर तुफान गाजले. मात्र, या दोघांच्या साखरपुड्याची गोष्ट अत्यंत फिल्मी आहे.

पूजा आणि सोहमने अक्षय तृतीयेच्या मुहूर्तावर एकमेकांसाठी कोणालाही न सांगता गुपचूप अंगठ्या खरेदी केल्या होत्या. विशेष म्हणजे, अंगठी खरेदी केल्यानंतर हे दोघेही त्याबद्दल पूर्णपणे विसरून गेले. लग्नाच्या अवघ्या तीन दिवस आधी कपाट आवरताना सोहमला ती अंगठी सापडली आणि मग प्रपोजलचे प्लॅनिंग सुरू झालं.

पूजाने सांगितलेला किस्सा तर अधिकच रंजक आहे. राजश्री मराठीला दिलेल्या मुलाखतीमध्ये ती म्हणाली, "मला खूप मोठं आणि गाजावाजा करणारं प्रपोजल नको होतं. मी सोहमला म्हणाले, "मुलगी मुलाला का प्रपोज करू शकत नाही? आपण ही अंगठी आत्ताच घालून बघूया का? सोहम काही समजण्याच्या आत मी वांद्र्याच्या एका पेट्रोल पंपावर गाडी उभी असतानाच त्याच्या बोटात अंगठी घातली!".

यावर सोहमची रिॲक्शन अत्यंत मजेशीर होती. तो म्हणाला, "काय गं, वांद्र्याच्या पेट्रोल पंपावर तू मला प्रपोज केलंस?". त्यानंतर दोघांनी त्या अंगठ्या पुन्हा बॉक्समध्ये ठेवून दिल्या. मात्र लग्नाच्या दिवशी सोहमने एक अतिशय रोमँटिक सेटअप तयार केला आणि सर्वांसमोर पूजाला अधिकृतपणे प्रपोज करत अंगठी घातली.