मराठीतही गुरुवारीप्रदर्शनाचा दम

दिवाळीच्या उत्साहात प्रेक्षक थिएटरपर्यंत जाईल का, या शंकेने अनेक जण ऐन दिवाळीत चित्रपट प्रदर्शन करण्याची हिंमत दाखवित नव्हते. बिग बजेट सिनेमाच दिवाळीचा सगळा काळ व्यापून टाकत होते. आता मराठी सिनेमाने हे आव्हान स्वीकारले असून, यंदाच्या पाडव्याला दोन बिग बजेट मराठी चित्रपट प्रदर्शित होत आहेत. शुक्रवारीच चित्रपट प्रदर्शित करण्याची परंपरा असली तरी गुरुवारी पाडव्याच्या दिवशी रसिकांना खऱ्या अर्थाने दिवाळीची भेट मिळणार आहे. ‘मुबंई- पुणे-मुंबई २’ आणि ‘कट्यार काळजात घुसली’ हे पाडव्याला प्रदर्शित होणारे पहिले चित्रपट ठरणार आहेत. गेल्या वर्षी शुक्रवारीच पाडवा आला होता. या दिवशी ‘प्यावाली लव्हस्टोरी’ हा स्वप्निल जोशीचा चित्रपट प्रदर्शित झाला होता. या वर्षी मात्र स्वप्निलने ‘मुंबई-पुणे-मुबंई २’ गुरुवारी प्रदर्शित करण्याची हिंमत दाखविली आहे. नाणेच खणखणीत असेल तर ते चालणारच, ही हिंमत आता मराठी चित्रपटांमध्येही आली आहे, हेच यातून दिसून येत आहे. स्वप्निल जोशी-मुक्ता बर्वेच्या लग्नाची गोष्ट असणारा ‘मुंबई-पुणे-मुंबई २’ आणि मराठी रंगभूमीवरील मानाचे पान असलेले नाटक रुपेरी पडद्यावर आणण्याची सुबोध भावे याची कामगिरी असलेले ‘कट्यार काळजात घुसली’ हे दोन चित्रपट पाडव्याच्या दिवशी प्रदर्शित होत आहेत. सलमान खान ईदच्या दिवशी चित्रपट प्रदर्शित करतो़ शाहरुख वर्षअखेरीस रसिकांना आपल्या चित्रपटाची गिफ्ट देतो, तसे आता मराठीतही सुरू होणार आहे. स्वप्निल जोशी आणि सुबोध भावे यांनी त्यासाठी पुढाकार घेतला आहे. मराठी फिल्म इंडस्ट्रीचा आतापर्यंतचा प्रवास पाहिला तर ऐन दिवाळीच्या काळात चित्रपट प्रदर्शित करण्यास निर्माते फार इच्छुक नसायचे. याचे कारण म्हणजे दिवाळीमध्ये सर्वजण घरीच आनंद साजरा करीत असताना थिएटरमध्ये जाऊन पिक्चर कोण पाहणार, अशी शंका त्यांना येत होती. मात्र स्वप्निल व सुबोधचा गेल्या वर्षाचा प्रवास पाहिला तर हे दोघेही स्वत: चित्रपटाच्या प्रमोशनसाठी कष्ट करीत असल्याचे दिसून येते. मराठी रसिकांना चित्रपटगृहापर्यंत खेचून आणण्यात महत्त्वाची भूमिका असणाऱ्या स्वप्निल-सुबोधने आता दिवाळीत चित्रपट प्रदर्शित करण्याचे आव्हानही स्वीकारले आहे. दिवाळीच्या पारंपरिक उत्साहात मराठी नाटकाची भव्यता अनुभवयाची संधी ‘कट्यार काळजात घुसली’च्या प्रेक्षकांना मिळणार आहे. अनेक मातब्बर कलाकारांच्या अभिनयाने सजला आहे. सुबोध भावे यांनी निर्मितीचे शिवधनुष्य पेलतानाच प्रमुख भूमिका अगदी झोकात साकारली आहे. सचिन पिळगावकर, शंकर महादेवन यांच्यासह चित्रपटात सुबोध भावे, अमृता खानविलकर, मृण्मयी देशपांडे, पुष्कर श्रोत्री आणि साक्षी तन्वर यांच्या महत्त्वाच्या भूमिका आहेत. स्वातंत्र्यपूर्व कालखंड आणि राजे रजवाड्यांची भव्यता यामुळे कट्यार काळजात घुसणार हे निश्चितच. ‘मुंबई-पुणे-मुंबई २ -लग्नाला यायचंच’ ही अगदी स्वप्निल टाईप मूव्ही आहे. मुक्ता बर्वेसोबतची त्याची केमिस्ट्री नेहमीच रंगते आणि ती या चित्रपटात अगदी मॅजिक करतेय, असे प्रोमोजवरून दिसत आहे. त्याचबरोबर प्रशांत दामले प्रथमच वडिलांच्या भूमिकेत पाहणेही वेगळे ठरणार आहे. स्वप्निल-प्रशांत ही बापलेकांची जोडी लग्नात धमाल करणार हे निश्चित. त्यामुळे पूर्णपणे कौटुंबिक आणि नात्यांचा आनंद देणारा हा चित्रपट दिवाळीच्या दिवशी पाहण्यासारखी मजा नाही. मराठी चित्रपटसृष्टीने मोठी झेप घेतली आहे. अनेक नवीन ट्रेंड आत्मसात केले आहेत. पाडव्याच्या दिवशी गुरुवारी चित्रपट प्रदर्शित करून मराठी रसिकांना ही आमची भेटच आहे. प्रेक्षक ‘मुंबई-पुणे-मुंबई २-लग्नाला यायचंच’ पाहायला येणारच, हा आत्मविश्वास आम्हाला आहे. चित्रपट पाहून मराठी रसिक पाडवा साजरा करतील. शुक्रवारीच प्रदर्शित करण्याच्या मानसिकतेतूनही बाहेर पडेल. - संजय छाब्रिया, निर्मातामराठी प्रेक्षकांच्या मर्मबंधातील ठेव असलेले ‘कट्यार काळजात घुसली’ नाटक भव्य स्वरूपात रुपेरी पडद्यावर देण्याची भेट दिवाळीतच प्रेक्षकांना द्यायची हे आम्ही ठरविलेच होते. पाडव्याला चित्रपट प्रदर्शित करून मराठी प्रेक्षकांचा आम्ही गौरवच करीत आहोत. प्रेक्षक नक्कीच हा नवीन बदल स्वीकारतील, अशी आम्हाला खात्री आहे. सर्वांनी एकत्र बसून ‘कट्यार काळजात घुसली’ची रुपेरी पडद्यावर अनुभूती घ्यावी, यासाठी मुद्दामहून आम्ही पाडव्याच्या दिवशी गुरुवारी चित्रपट प्रदर्शित करीत आहोत.- सुबोध भावे, अभिनेता-निर्माता

- milan.darda@lokmat.com