"बाबा, थांब ना रे तू, जाऊ नको दूर..." वडिलांच्या आठवणीत सायली संजीव झाली भावुक

सायली संजीवच्या वडिलांचे ३० नोव्हेंबर २०२१ रोजी निधन झाले होते.

सायली संजीव ही मराठी मनोरंजनविश्वातील प्रसिद्ध अभिनेत्री आहे. झी मराठी वाहिनीवरील 'काहे दिया परदेस' या मालिकेतून तिने प्रचंड लोकप्रियता मिळवली. या मालिकेत तिने साकारलेल्या गौरीनं प्रेक्षकांच्या मनात घर केलं. मराठी मालिकांसह सायलीने चित्रपटांमधूनही काम करत आपल्या अभिनयाच्या ठसा प्रेक्षकांच्या मनावर उमटवला आहे. सायली तिच्या कुटुंबियांच्या फार जवळ आहे. तिच्या कुटुंबातील सदस्यांविषयी पोस्ट शेअर करताना ती अनेकदा भावुक होते. आज तिनं वडिलांसोबतचे काही जुने फोटो शेअर केले आहेत.

सायली संजीवच्या वडिलांचे ३० नोव्हेंबर २०२१ रोजी कर्करोगाने निधन झाले होते. वडिलांच्या निधनाचा धक्का सायलीसाठी खूप मोठा होता. आज वडिलांच्या आठवणीत सायलीने जुने फोटो शेअर केले आहेत. या फोटोसोबत तिने "बाबा, थांब ना रे तू, जाऊ नको दूर..." हे गाणं जोडलं. सायलीची ही भावनिक पोस्ट पाहून तिचे चाहतेही भावुक झाले.

सायली संजीवचे वडील संजीव चांदसरकर हे होते. ते नाशिकमधील तहसीलदार होते. सायली तिच्या वडिलांच्या खूप जवळ होती. दोघांचं एकमेकांशी अगदी घट्ट नातं होतं. सायलीच्या नावातील संजीव हे आडनाव नसून तिच्या वडीलांचे नाव आहे. ऐवढंच नाही तर वडिलांवरील प्रेमासाठी सायलीने खास टॅटूही काढला आहे. सायलीच्या कामाबद्दल बोलायचं झालं तर ती अलिकडेच  'समसारा' सिनेमातून प्रेक्षकांच्या भेटीला आली होती.  या चित्रपटात तिच्यासोबत अभिनेता ऋषी सक्सेना मुख्य भूमिकेत होता. 'काहे दिया परदेस' या मालिकेनंतर ही जोडी पुन्हा एकदा एकत्र रुपेरी पडद्यावर झळकली होती.