हॉलिवूडचा 'हा' सिनेमा भारतात रिलीज झाला आणि ५० कोटींहून जास्त कमावून गेला; आजही थिएटरमध्ये 'हाऊसफुल्ल'

या चित्रपटाची सध्या खूप चर्चा आहे. माऊथ पब्लिसिटीच्या जोरावर या चित्रपटाने भारतात ५० कोटींपेक्षा जास्त कमाई केली आहे.

Michael Box office Collection: 'मायकल' या हॉलीवूड चित्रपटाची सध्या चर्चा आहे. जगप्रसिद्ध पॉप स्टार मायकल जॅक्सनच्या आयुष्यावर हा चित्रपट आधारीत आहे. या चित्रपटाने रिलीजच्या प्रदर्शनाच्या १९ व्या दिवशी भारतातील १,४५४ शोजच्या माध्यमातून सुमारे १.०५ कोटी रुपयांची कमाई केली आहे. या नव्या आकडेवारीमुळे चित्रपटाचे भारतातील एकूण ग्रॉस कमाई आता ६४.७१ कोटी रुपयांवर पोहोचले असून, भारतातील (Net) कमाई ५४.०५ कोटी रुपये झाली आहे.

या चित्रपटाच्या यशामागे सर्वात मोठे कारण म्हणजे जगप्रसिद्ध पॉप स्टार मायकल जॅक्सनची लोकप्रियता. त्याचं जीवन, संगीतातील कारकीर्द आणि त्याच्याशी संबंधित वाद याबद्दलची उत्सुकता आजही प्रेक्षकांमध्ये कायम आहे. यामुळेच विविध वयोगटातील प्रेक्षक चित्रपटगृहांकडे आकर्षित होत आहेत. सोशल मीडियावरील सकारात्मक प्रतिक्रिया आणि बॉक्स ऑफिसवरील प्रतिसाद यामुळे या चित्रपटाला आणखी यश मिळत आहे. आता हा चित्रपट तिसऱ्या आठवड्यात प्रवेश करत असून, पुढील दिवसांतही कमाई कशी वाढते, याकडे सर्वांचं लक्ष आहे.



'मायकल' चित्रपटाच्या सुरुवातीच्या कमाईवर नजर टाकली तर १० व्या दिवशी या चित्रपटाने सुमारे २.८७ कोटी ते ३.२१ कोटी रुपयांची कमाई केली होती, ज्यामुळे त्यावेळी चित्रपटाने भारतात ३६ कोटींचा आकडा पार केला होता. एकूणच 'मायकल' या चित्रपटाने माऊथ पब्लिसिटीच्या जोरावर प्रेक्षकांची गर्दी खेचून आणली. भारतातही मायकल जॅक्सनची किती क्रेझ आहे हेच यावरुन दिसून आलं. 'मायकल' या चित्रपटात मायकल जॅक्सनचा पुतण्या जॅफर जॅक्सनने भूमिका साकारली आहे. जॅफरच्या भूमिकेचं खूप कौतुक होतंय.