BAFTAS 2017: देव पटेल ठरला ‘सरप्राईज’ विजेता; ‘ला ला लँड’चा दबदबा कायम
By ऑनलाइन लोकमत | Updated: February 13, 2017 12:33 IST
इंग्लंडमध्ये सिनेमांसाठी दिला जाणारा सर्वोच्च पुरस्कार सोहळा ‘बाफ्टा’ नुकताच पार पडला. अपेक्षेप्रमाणे रायन गोस्लिंग आणि एमा स्टोन स्टारर ‘ला ...
BAFTAS 2017: देव पटेल ठरला ‘सरप्राईज’ विजेता; ‘ला ला लँड’चा दबदबा कायम
इंग्लंडमध्ये सिनेमांसाठी दिला जाणारा सर्वोच्च पुरस्कार सोहळा ‘बाफ्टा’ नुकताच पार पडला. अपेक्षेप्रमाणे रायन गोस्लिंग आणि एमा स्टोन स्टारर ‘ला ला लँड’ या चित्रपटाने सर्वोत्कृष्ट चित्रपटासह पाच पुरस्कारांवर नाव कोरले. परंतु या सोहळ्याचा सर्वात ‘सरप्राईजिंग’ विजय ठरला तो भारीतय वंशाचा ब्रिटिश अभिनेता देव पटेलचा.‘लायन’ चित्रपटातील ‘सरू ब्रिअर्ली’ या भूमिकेसाठी सर्वोत्कृष्ट सहअभिनेत्याचा ‘बाफ्टा’ पुरस्कार त्याला मिळाला. लहानपणी आॅस्ट्रेलियामध्ये दत्तक घेतलेला आणि मोठेपणी भारतात आपल्या खऱ्या आईवडिलांचा शोध घेणाऱ्या मुलाच्या सत्यकथेवर आधारित या सिनेमासाठी देव पटेल दोन आठवड्यांनी होणाऱ्या आॅस्कर पुरस्कारांमध्येसुद्धा ‘बेस्ट सपोर्टेड अ‍ॅक्टर’ म्हणून नामांकित आहे.पुरस्कार स्वीकारताना तो भावूकपणे म्हणाला की, ‘हे खरंच घडलंय यावर माझा विश्वासच बसत नाही. सीमा, वंश, वर्ण यांच्या पलीकडे जाणाऱ्या प्रेमाची ही गोष्ट आहे. हा त्या प्रेमाचा विजय आहे. माझ्या कुटुंबियांसोबत मिळून मी टीव्हीवर हा पुरस्कार सोहळा पाहायचो. आणि आता मला तो पुरस्कार मिळतोय म्हटल्यावर माझ्यासाठी ही स्वप्नवत अवस्था आहे.’ चित्रपटात त्याच्या बालपणाची भूमिका करणारा बालकलाकार सनी पवारसोबत तो हा अवॉर्ड शेअर करणार असल्याचे त्याने सांगितले.