Priyanka londhe
रॉकस्टारच्या इमेजमध्ये सध्या अभिनेता फरहान अख्तर आपल्याला पाहायला मिळतोय. एकदम कुल डूडच्या लूकमधील फरहानच्या गाण्यावर सध्या तरुणाई वेडी झाली आहे. रॉक ऑन २ या चित्रपटामध्ये आपल्याला फरहान हटके अंदाजात दिसणार आहे. या चित्रपटाविषयी या रॉकस्टारने लोकमत सीएनएक्सशी मारलेल्या या मनमोकळ्या गप्पा...
रॉक ऑन चित्रपट आठ वर्षांनी पुन्हा नव्या रुपात येत आहे, याबदद्ल तू काय सांगशील ?
गेल्या सात वर्षांमध्ये या चित्रपटातील प्रत्येक पात्राचे आयुष्य बदललेले आहे. नवीन मुलगी जियाची एंट्री या सिनेमात झाली आहे. चित्रपटाचे संगीत फार वेगळे आहे. सर्व पात्र मॅच्युअर्ड झाली आहेत आणि तिच मॅच्युरिटी सिनेमाच्या संगीतातही येण्याची गरज आहे. त्यामुळे चित्रपटातील संगीत देखील एकदम हटके आहे.
शिलाँगमध्ये शूटिंग करण्याचे काही खास कारण होते का?
शिलाँग रॉक म्युझिक कॅपिटल ऑफ इंडिया म्हणून ओळखले जाते. शिलाँग अतिशय सुंदर निसर्गरम्य ठिकाण आहे. तिथल्या लोकांनी फार आदरातिथ्याने आमचे स्वागत केले. शिलाँगमध्ये चित्रीकरण करण्याचा आमचा अनुभव अविस्मरणीय होता.
तुला अनेक चित्रपटांसाठी पुरस्कार मिळाले आहेत, रॉक ऑनसाठी राष्ट्रीय पुरस्कार देखील मिळाला होता. आता काही अपेक्षा आहेत का?
चित्रपट तयार करताना मी कधीच पुरस्कारांचा विचार करत नाही. चित्रपट कधी यशस्वी होतो तर कधी अपयशी. त्यामुळे कोणत्याही चित्रपटाच्या बाबतीत काहीही होऊ शकते. प्रत्येक दिग्दर्शक, निर्मात्याला आपला चित्रपट चालावा, प्रेक्षकांनी-समीक्षकांना तो आवडावा असेच वाटत असते. त्यामुळे काम करताना कधीही पुरस्कारांचा विचार करत नाही.
मराठी चित्रपटाची निर्मिती करण्याचा काही विचार आहे का?
मराठी चित्रपट मी पाहिले आहेत. मला मराठी बोलता येत नसले तरी पण मी मराठी समजते. जर चांगल्या मराठी चित्रपटासाठी मला विचारण्यात आले तर मी खरेच अभिनय करायला तयार आहे. फक्त त्यासाठी मला मराठी भाषा शिकायला लागेल, आणि माझी ती शिकण्याची तयारी आहे. उत्तम कथा मिळाली तर मराठी चित्रपटाची निर्मिती देखील नक्कीच करीन.
झोया सोबत काम करतानाचा अनुभव कसा असतो?
झोयासोबत काम करताना मला खरेच मजा येते. आम्ही दोघे एकमेकांना एवढे चांगले ओळखतो कि कधी कधी बोलायची ही गरज भासत नाही. आम्हाला एकमेकांचे हावभाव पाहुनच समजतो कि कोणाला काय म्हणायचे आहे. त्यामुळे झोयासोबत काम करताना, सेटवर असताना मला फारच कम्फर्टेबल वाटते.
तुला शायरीची देखील आवड आहे, तुझे आवडते शायर कोण आहेत?
मला कविता नक्कीच आवडतात. मी कविता, शायरी वाचतो, पण त्यापेक्षा जास्त मला ऐकायला आवडतात. त्यामुळे कोणा एकाचे नाव घेणे फार अवघड आहे. माझ्या वडिलांच्या देखील शायरी मला आवडतात. फिराकच्या कविता मला जास्त आवडतात.