'या' चित्रपटासाठी अमिताभ बच्चन यांनी एकही रुपया घेतला नाही; तुर्कीमध्येही झालाय रिमेक

अमिताभ बच्चन हे सध्या जगातील सर्वात श्रीमंत अभिनेत्यांपैकी एक आहेत.

बॉलिवूडचे महानायक अमिताभ बच्चन हे सध्या जगातील सर्वात श्रीमंत अभिनेत्यांपैकी एक आहेत. अमिताभ बच्चन यांनी त्यांच्या पाच दशकांच्या प्रदीर्घ कारकिर्दीत अनेक अजरामर चित्रपट दिले आहेत. अभिनयाप्रती त्यांचे समर्पण नेहमीच वाखाणण्याजोगे राहिले आहे. अमिताभ हे चित्रपटांसाठी प्रचंड मानधन घेतात, जे अनेक कोटींच्या घरात आहे.  पण, असा एक चित्रपट आहे, ज्यात बिग बींनी केवळ उत्कृष्ट अभिनयच केला नाही, तर चक्क एकही रुपया मानधन न घेता काम केले होते.

दिग्दर्शक संजय लीला भन्साळी यांच्या चित्रपट बनवण्याच्या शैलीवर अमिताभ बच्चन नेहमीच प्रभावित राहिले आहेत. जेव्हा भन्साळींनी 'ब्लॅक'ची कथा बिग बींना ऐकवली, तेव्हा ते इतके प्रभावित झाले की त्यांनी मानधन घेण्यास स्पष्ट नकार दिला. अमिताभ यांच्या मते, अशा उत्कृष्ट कलाकृतीचा भाग असणे हेच त्यांच्यासाठी सर्वात मोठे मानधन होते.

'ब्लॅक' हा चित्रपट अंध आणि बहिरी असलेल्या प्रसिद्ध कार्यकर्त्या हेलेन केलर यांच्या जीवनावर आधारित होता. या चित्रपटात अमिताभ बच्चन यांनी 'देबराज सहाय' या मार्गदर्शकाची भूमिका साकारली होती, तर राणी मुखर्जीने 'मिशेल मॅकनॅली' हे आव्हानात्मक पात्र साकारले होते. २२ कोटी रुपयांच्या बजेटमध्ये तयार झालेल्या या चित्रपटाने बॉक्स ऑफिसवर ६६ कोटी रुपयांची कमाई केली होती.

या चित्रपटाचे यश केवळ भारतापुरते मर्यादित राहिले नाही. 'ब्लॅक'च्या भावनिक कथानकाने जागतिक स्तरावर छाप पाडली. २०१३ मध्ये, तुर्की दिग्दर्शक उगुर युसेल यांनी 'बेनिम दुन्याम' (Benim Dünyam) या नावाने या चित्रपटाचा अधिकृत रिमेक केला. एखाद्या भारतीय चित्रपटाची तुर्की भाषेत पुनर्निर्मिती होणे, ही या कलाकृतीसाठी मोठी पावती मानली जाते. 

अमिताभ बच्चन यांनी स्वतः आपल्या ब्लॉगमध्ये या चित्रपटाचा उल्लेख करताना म्हटले होते की, "काही सिनेमे पैशापेक्षा खूप मोठे असतात". 'ब्लॅक'मधील त्यांच्या भूमिकेसाठी त्यांना राष्ट्रीय पुरस्कारानेही सन्मानित करण्यात आले होते.