सेन्सेक्स २४७ अंकांनी घसरला

रिझर्व्ह बँकेच्या पतधोरण आढाव्याच्या पूर्वसंध्येला शेअर बाजारात मोठी घसरण पाहायला मिळाली. मुंबई शेअर बाजाराचा सेन्सेक्स २४७ अंकांनी उतरला आहे

मुंबई : रिझर्व्ह बँकेच्या पतधोरण आढाव्याच्या पूर्वसंध्येला शेअर बाजारात मोठी घसरण पाहायला मिळाली. मुंबई शेअर बाजाराचा सेन्सेक्स २४७ अंकांनी उतरला आहे. हा सेन्सेक्सचा दोन आठवड्यांचा नीचांक ठरला आहे. राष्ट्रीय शेअर बाजाराचा निफ्टी ७,८00 अंकांच्या खाली घसरला आहे.
रिझर्व्ह बँकेचे गव्हर्नर रघुराम राजन हे उद्या पतधोरण आढावा जाहीर करणार आहेत. त्यात धोरणात्मक व्याजदरात कपात केली जाण्याची शक्यता आहे. असे झाल्यास ही या वर्षातील चौथी दरकपात ठरेल.
मुंबई शेअर बाजाराचा सेन्सेक्स सकाळी २५,९२२.७१ अंकांवर तेजीसह उघडला होता. त्यानंतर तो आणखी वर चढला. त्यानंतर मात्र नफा वसुलीचे सत्र सुरू झाले. त्यामुळे बाजार घसरणीला लागला. सत्राच्या अखेरीस तो २५,६१६.८४ अंकांवर बंद झाला. २४६.६६ अंकांची अथवा 0.९५ टक्क्यांची घसरण सेन्सेक्सने नोंदविली. ११ सप्टेंबर नंतरची सेन्सेक्सची ही सर्वाधिक नीचांकी पातळी ठरली आहे. त्या दिवशी सेन्सेक्स २५,६१0.२१ अंकांवर बंद झाला होता.
५0 कंपन्यांचा समावेश असलेला व्यापक आधारावरील एनएसई निफ्टी ७२.८0 अंकांनी अथवा 0.९३ टक्क्यांनी घसरून ७,७९५.७0 अंकांवर बंद झाला. त्याआधी तो दिवसभर खाली-वर होताना दिसून आला.
घसरणीचा कल असतानाही डॉ. रेड्डीजचा समभाग ५.३७ टक्के वाढला. लुपीन, हिंदुस्तान युनिलिव्हर, टीसीएस आणि एसबीआय यांचे समभागही वाढले.
२४ कंपन्यांना फटका
सेन्सेक्समधील ३0 कंपन्यांपैकी २४ कंपन्यांचे समभाग घसरले. आयसीआयसीआय बँकेचे समभाग स्थिर राहिला.
घसरणीचा फटका बसलेल्या कंपन्यांत टाटा मोटर्स, वेदांता, सन फार्मा, इन्फोसिस, कोल इंडिया, टाटा स्टील, एलअँडटी, विप्रो, भारती एअरटेल आणि हीरो मोटोकॉर्प यांचा समावेश आहे. (वृत्तसंस्था)