उद्योगांच्या विद्युत शुल्कमाफीस पाच वर्षांची मुदतवाढ

औद्योगिक विकासाच्या क्षेत्रात विदर्भ व मराठवाडा भागातील उद्योग टिकून राहावे, याकरिता या भागातील सर्व उद्योग घटकांना वीज बिलात विद्युत शुल्क माफीची सवलत आणखी पाच वर्षे लागू राहणार आहे.

वाशिम : औद्योगिक विकासाच्या क्षेत्रात विदर्भ व मराठवाडा भागातील उद्योग टिकून राहावे, याकरिता या भागातील सर्व उद्योग घटकांना वीज बिलात विद्युत शुल्क माफीची सवलत आणखी पाच वर्षे लागू राहणार आहे.
उर्वरित महाराष्ट्राच्या तुलनेत विदर्भ व मराठवाडा भाग औद्योगिकदृष्ट्या मागासलेला आहे. त्यामुळे राज्याचा सर्वांगिण विकास साध्य होण्याकरिता आधी विदर्भ व मराठवाड्याचा औद्योगिक विकास होणे आवश्यक आहे. त्याकरिता तेथील उद्योग स्पर्धात्मक युगात टिकून राहण्यासाठी ते सक्षम बनविणे ही काळाची गरज आहे. त्यादृष्टीने राज्य शासनाच्या उद्योग ,ऊर्जा व कामगार विभागाने १ एप्रिल २००९ ते ३१ मार्च २०१४ पर्यत विदर्भ व मराठवाड्यातील सर्व उद्योगघटकांना विद्युत शुल्क माफीची सवलत लागू केली होती. या सवलतीची मुदत ३१ मार्च २००१४ रोजी संपली होती. त्यामुळे या भागातील उद्योग घटकांना देण्यात येत असलेल्या विद्युत शुल्कमाफीच्या सवलतीस १ एप्रिल २०१४ ते ३१ मार्च २०१९ पर्यंत मुदतवाढ देण्याचा निर्णय उद्योग, उर्जा व कामगार विभागाने ६ जून रोजी घेतला आहे. या निर्णयानुसार विदर्भ व मराठवाड्यातील सर्व उद्योगघटकांना त्यांच्या विद्युत बिलाच्या १० ते १२ टक्के एवढ्या भराव्या लागणाऱ्या वीज शुल्क माफीची सवलत पुढील पाच वर्षे मिळणार आहे. (प्रतिनिधी)