Maharashtra Weather Update : थंडीला ब्रेक, उन्हाचा अटॅक; राज्यात तापमान वाढीचा अलर्ट

Maharashtra Weather Update : राज्यात थंडीचा प्रभाव कमी होत असतानाच आता उन्हाची तीव्रता वाढू लागली आहे. भारतीय हवामान विभाग (IMD) ने दिलेल्या ताज्या अंदाजानुसार, पुढील चार दिवसांत कोकण विभागात तापमान २ ते ३ अंशांनी वाढण्याची शक्यता आहे. जाणून घ्या तुमच्या जिल्ह्यात कसं असेल हवामान…

Maharashtra Weather Update : राज्यात थंडीचा कडाका ओसरत असतानाच आता उन्हाची तीव्रता वाढू लागली आहे. (Maharashtra Weather Update)

IMD ने वर्तवलेल्या अंदाजानुसार, महाराष्ट्रात पुढील काही दिवस हवामान प्रामुख्याने कोरडे राहणार असून विशेषतः कोकण विभागात तापमानात वाढ होण्याची शक्यता आहे. काही भागांत कमाल तापमान ३६ अंश सेल्सिअसपर्यंत पोहोचू शकते.(Maharashtra Weather Update)

कोकणात तापमान २ ते ३ अंशांनी वाढणार

कोकण विभागात पुढील चार दिवसांत कमाल तापमानात हळूहळू २ ते ३ अंश सेल्सिअसने वाढ होण्याचा अंदाज आहे. 

दक्षिण कोकणातील रत्नागिरी आणि सिंधुदुर्ग जिल्ह्यांमध्ये तुरळक ठिकाणी उष्ण आणि दमट वातावरण राहण्याची शक्यता आहे. दुपारच्या सुमारास उन्हाचा चटका अधिक तीव्र जाणवू शकतो.

तापमान ३४ ते ३६ अंशांदरम्यान राहण्याचा अंदाज असून नागरिकांना उकाड्याचा त्रास जाणवू शकतो. मात्र, या वाढीनंतर तापमानात मोठा बदल अपेक्षित नसल्याचे हवामान खात्याने स्पष्ट केले आहे.

मुंबईत निरभ्र आकाश, दुपारी उकाडा

मुंबई शहर आणि उपनगरांसाठी पुढील २४ तासांचा अंदाज पाहता आकाश प्रामुख्याने निरभ्र राहण्याची शक्यता आहे. कमाल तापमान सुमारे ३५ अंश सेल्सिअस तर किमान तापमान २१ अंशांच्या आसपास राहू शकते.

यामुळे दुपारी उन्हाचा चटका जाणवणार असला तरी रात्री आणि पहाटे हवेत काहीसा गारवा कायम राहील. समुद्रकिनारी भागात दमटपणा अधिक जाणवू शकतो.

मध्य महाराष्ट्र, मराठवाडा आणि विदर्भात कोरडे हवामान

कोकणासह मध्य महाराष्ट्र, मराठवाडा आणि विदर्भातही पुढील काही दिवस हवामान कोरडे आणि सूर्यप्रकाशित राहण्याची शक्यता आहे. 

किमान तापमानात ४ ते ५ दिवसांत कोणताही मोठा बदल अपेक्षित नाही.

विदर्भात दुपारच्या वेळी उष्णता वाढू शकते, मात्र सकाळ-संध्याकाळ हवामान तुलनेने सौम्य राहील. मराठवाड्यातही पावसाची शक्यता नसून कोरडे वातावरण कायम राहील.

आजचा हवामान अंदाज

कोकण – हवामान कोरडे; काही ठिकाणी उष्ण व दमट वातावरण

मध्य महाराष्ट्र – प्रामुख्याने कोरडे हवामान

मराठवाडा – कोरडे आणि स्वच्छ आकाश

विदर्भ – कोरडे हवामान, दुपारी उष्णता वाढण्याची शक्यता

नागरिकांनी घ्यावयाची काळजी

तापमान वाढीच्या पार्श्वभूमीवर दुपारी १२ ते ४ या वेळेत अनावश्यक बाहेर जाणे टाळावे. पुरेसे पाणी पिणे, डोक्यावर टोपी किंवा छत्री वापरणे आणि हलक्या रंगाचे सैल कपडे परिधान करणे आवश्यक आहे.

लहान मुले, ज्येष्ठ नागरिक आणि मैदानी काम करणारे शेतकरी यांनी विशेष काळजी घ्यावी. उष्माघात टाळण्यासाठी नियमित पाणी व द्रवपदार्थांचे सेवन करणे गरजेचे आहे.

राज्यात सध्या पावसाचा कोणताही अंदाज नसून उन्हाळ्याची चाहूल स्पष्टपणे जाणवू लागली आहे. पुढील काही दिवसांत कोकणात तापमानात वाढ होणार असली तरी तीव्र उष्णतेची लाट येण्याची शक्यता सध्या तरी कमी असल्याचे हवामान विभागाने स्पष्ट केले आहे.

शेतकऱ्यांना सल्ला 

* पाण्याचे नियोजन करा

* दुपारच्या कडक उन्हात पाणी देणे टाळावे.

* सकाळी लवकर किंवा संध्याकाळी सिंचन करावे.

* ठिबक किंवा तुषार सिंचन पद्धतीचा वापर केल्यास पाण्याची बचत होईल, असा सल्ला देण्यात आला आहे.

हे ही वाचा सविस्तर : Maharashtra Weather Update : शिमग्याआधीच उन्हाळा सुरू? कोकण ते विदर्भ उष्ण वाऱ्यांचा जोर वाढणार वाचा सविस्तर