नाशिक : जिल्ह्यामधील येवला व नांदगाव या तालुक्यामध्ये अचानक झालेल्या अवकाळी पावसामुळे विविध पिकांचे नुकसान झाले असून, यामुळे कीड व रोगाचा प्रादुर्भाव व पिक अशक्त होऊन अजून जास्त प्रमाणात नुकसान होऊ शकते. त्यामुळे पिकांचे व्यवस्थापन करणे गरजेचे आहे, जेणेकरून पिके त्या परिस्थितीतून लवकरात लवकर सावरतील.
कांदा-
- कांदा शेतात पाणी साचून राहू देऊ नका, अतिरिक्त पाणी काढून टाकावे.
- कांदा पिकामध्ये अचानक पाऊस पडल्यामुळे बुरशीजन्य रोगांचा (करपा) तसेच फुल किडीचा प्रादुर्भाव वाढण्याची शक्यता नाकारता येत नाही.
- यासाठी अॅझाक्सीस्ट्रोबीन ०.५ मि. लि. प्रति लिटर किंवा टेब्युकोनॅझोल १ मि. लि. प्रति लिटर पाण्यातून फवारणी करावी.
- तसेच फुलकिड्यांच्या नियंत्रणासाठी फिप्रोनील १.५ मि. लि. प्रति लिटर स्टीकरसह फवारावे..
- यानंतर दुसरी फवारणी ३ ते ४ दिवसानंतर १३:००:४५ ची ५ ग्रॅम प्रति लिटर अधिक सूक्ष्म अन्नद्रव्यांच्या मिश्रणांची २.५ ग्रॅम प्रति लिटर एकत्रितपणे फवारणी करावी.
- अशा अवस्थेत पिकास जमिनीतून एकरी ५० किलो म्युरेट ऑफ पोटॅश द्यावे.
गहू -
- गहू पिकात पाणी साचलेले असल्यास अतिरिक्त पाण्याचा निचरा करावा
- शक्य असल्यास पाणी कमी ठेवा, पुढील पाणी देणे टाळा.
- पानांवर पिवळट-तपकिरी/केशरी पावडरसारखे डाग (तांबेरा रोगासाठी तसेच पानांच्या कडा किंवा मध्यभागी तपकिरी, जळल्यासारखे डाग (करपा) दिसल्यास प्रोपिकोनाझोल २५ टक्के इसी १ मिली / लिटर किंवा हेक्साकोनाझोल ५ टक्के इसी १ मिली / लिटर प्रमाण घेऊन फवारणी करावी.
द्राक्षे -
- अवकाळी पाऊस पडल्यानंतर द्राक्ष पिकामध्ये डाऊनी मिल्ड्यू / पावडरी मिल्ड्यू या रोगाचा प्रादुर्भाव
- वाढण्याची शक्यता असल्याने पाऊस थांबताच डाऊनी मिल्ड्यू साठी मेटालॅक्सिल मॅन्कोझेब २५ ग्रॅम/२० लिटर पाणी फॉसेटिल-अल २० ग्रॅम / १० लिटर पाणी घेऊन फवारणी करावी.
- पावडरी मिल्ड्यू साठी हेक्साकोनाझोल ५ टक्के इसी 10 मिली/10 लिटर किंवा टेबुकोनाझोल २५ टक्के इसी 10 मिली/10 लिटर पाणी घेऊन फवारणी करावी.
वेलवर्गीय भाजीपाला
वेलवर्गीय भाजीपाल्यामध्ये भुरी आणि अॅन्थ्रैक्नोज नियंत्रणासाठी हेक्झाकोनॅझॉल १ मि. लि. प्रति लिटर या प्रमाणात फवारणी करून घ्यावी.
- विशाल जी चौधरी, विषय विशेषज्ञ (पिक संरक्षण), केव्हीके मालेगाव