शेतकरी हंगाम निहाय विविध प्रसारीत व पूर्व प्रसारीत वाणाचा वापर करून बेण्याद्वारे व एक डोळा रोपाद्वारे ऊस लागण करत असतात.
सध्या शेतकरी बेणेएवजी एक डोळा रोप लागणीस प्राधान्य देताना दिसून येत आहे, कारण रोपाद्वारे लागण केल्यास बियाणे खर्चात व लागण खर्चात बचत होऊन किमान एक महिना वेळेमध्ये बचत होते.
ऊस रोपे निर्मितीसाठी गादी वाफा पध्दत
◼️ यासाठी १ मीटर रूंदीचे व १० मीटर लांबीचे वाफे तयार करावेत.
◼️ गादी वाफे तयार करताना तळाशी प्लॅस्टीक पेपर किंवा खतांच्या रिकाम्या पिशव्या अंथरून घ्याव्यात.
◼️ चांगले कुजलेले शेणखत व मातीचा मिश्रणाच्या सहा इंच जाडीचा थर द्यावा.
◼️ यानंतर बुरशीनाशक व किटकनाशकाची बेणे प्रक्रिया केलेल्या दोन इंचाच्या एक डोळा कांड्या घ्याव्यात.
◼️ एक ते दोन इंच कांडीतील अंतर व दोन ओळीतील अंतर एक इंच याप्रमाणे मांडणी करावी.
◼️ दोन ते अडीच सें.मी. मातीचा थर वर दिल्यास अर्ध्या गुंठा क्षेत्रा (५० चौ.मी.) मध्ये एक हेक्टरला पुरतील एवढे रोपे तयार होतात.
◼️ रोपे काढताना गादी वाफ्यास पाणी देवून रोपे काढल्यास मुळ्या तुटत नाहीत आणि सुकत नाहीत.
◼️ काढलेल्या रोपांची लागवड लवकर केल्यास रोपे मरीचे प्रमाण कमी होते.
◼️ यासाठी खर्चसुध्दा कमी येऊन बेणे वाहतुकीचा खर्च कमी होतो.
अधिक वाचा: नर्सरीमधून फळांची रोपे खरेदी करताना त्यांची निवड कशी करावी? लागवड कशी करावी? वाचा सविस्तर