Onion Market : रब्बी हंगामातील लाल कांद्याची काढणी जोरात सुरू असतानाच बाजारात दर कोसळल्याने शेतकरी अडचणीत सापडले आहेत. (Onion Market)
एकेकाळी रोख पीक म्हणून ओळखल्या जाणाऱ्या कांद्याने यंदा शेतकऱ्यांना निराश केले असून, सध्या चांगल्या प्रतीच्या कांद्यालाही केवळ ५ ते ७ रुपये प्रति किलो इतकाच दर मिळत आहे. परिणामी, उत्पादन खर्चही निघत नसल्याने शेतकऱ्यांचे आर्थिक गणित कोलमडले आहे.(Onion Market)
काढणीच्या हंगामातच दर कोसळले
जिल्ह्यासह राज्यात मोठ्या प्रमाणावर कांद्याची आवक वाढली आहे. याच कारणावरून व्यापारी कमी दर देत असल्याचे शेतकऱ्यांचे म्हणणे आहे.
काढणीच्या काळातच दर घसरल्याने शेतकऱ्यांच्या हाती काहीच राहत नसल्याची स्थिती आहे.
व्यापाऱ्यांची मनमानी; गोणीवर १ किलो घट
काही खासगी व्यापाऱ्यांकडून शेतकऱ्यांची लूट होत असल्याचे आरोप समोर येत आहेत.
प्रत्येक ४० ते ४५ किलोच्या गोणीवर १ किलो अतिरिक्त घट लावली जाते
यामुळे शेतकऱ्यांना प्रत्यक्षात मिळणारा दर आणखी कमी होतो
या प्रकारावर प्रशासनाने तातडीने कारवाई करावी, अशी मागणी होत आहे.
किरकोळ बाजारात दर जास्त; शेतकऱ्यांना तोटा
घाऊक बाजारात शेतकऱ्यांना ५-७ रुपये दर मिळत असताना, किरकोळ बाजारात ग्राहकांना १५ ते २० रुपये किलो दराने कांदा विकला जात आहे.
यामधील नफा दलाल आणि मधल्या साखळीतील व्यापाऱ्यांकडे जात असून, मूळ उत्पादक शेतकरी मात्र तोट्यात आहे.
निर्यात ठप्प; दर घसरणीचे मोठे कारण
आखाती देशांमधील युद्धजन्य परिस्थितीमुळे कांद्याची निर्यात मोठ्या प्रमाणात घटली आहे. विशेषतः दुबईमार्गे होणारी निर्यात थांबल्याने स्थानिक बाजारात आवक वाढली आणि दर कोसळले.
काही दिवसांपूर्वी १००० रु. प्रति क्विंटल मिळणारा कांदा आता ५०० ते ७०० रु. प्रति क्विंटल दराने विकला जात आहे.
उत्पादन खर्च वाढला; नफा शून्य
कांदा पिकासाठी शेतकऱ्यांना मोठा खर्च करावा लागतो:
बियाणे (महाग दर्जेदार बियाणे)
खते व कीटकनाशके
मजुरी (काढणी, साठवण, वाहतूक)
मजुरी दरही दुप्पट झाल्याने खर्च प्रचंड वाढला आहे. अशा परिस्थितीत सध्याचे दर म्हणजे थेट तोटा असल्याची भावना शेतकऱ्यांनी व्यक्त केली.
काढणीच्या हंगामातच दर एवढे कमी आहेत की खर्चही निघत नाही. व्यापारी बेभाव खरेदी करत आहेत.- गजानन पेसोडे, शेतकरी, पिंप्राळा
४०-४५ किलोच्या गोणीवर १ किलो घट लावल्याने आम्हाला योग्य मोबदला मिळत नाही. प्रशासनाने तातडीने कारवाई करावी.- अमोल राठोड, शेतकरी, पिंप्री गवळी
शासन हस्तक्षेपाची मागणी
सध्याची परिस्थिती पाहता शेतकऱ्यांकडून पुढील मागण्या होत आहेत:
कांद्याला हमीभाव किंवा बाजार हस्तक्षेप
व्यापाऱ्यांच्या गैरप्रकारांवर कारवाई
निर्यात सुरू करण्यासाठी उपाययोजना
कांद्याच्या दरातील घसरण ही शेतकऱ्यांसाठी मोठा धक्का ठरत आहे. उत्पादन खर्च वाढत असताना मिळणारा कमी दर शेतकऱ्यांना आर्थिक संकटात ढकलत आहे.
तातडीने शासनाने हस्तक्षेप करून शेतकऱ्यांना दिलासा देणे आवश्यक असल्याची मागणी जोर धरत आहे.
हे ही वाचा सविस्तर : Halad Bajarbhav : हळदीने तोडले सर्व रेकॉर्ड; बाजारात मिळाला जबरदस्त भाव