दिवाळीनिमित्त काही कांदा बाजारपेठ बंद, वसुबारसेला निवडक बाजारात काय दर मिळाले? 

Diwali Kanda Market : दिवाळी सणाचे निमित्त समोर ठेवून राज्यातील विविध कांदा बाजारपेठा तब्बल ११ दिवस बंद ठेवण्याचा निर्णय घेण्यात आला आहे.

नाशिक : दिवाळी सणाचे निमित्त समोर ठेवून राज्यातील विविध कांदा बाजारपेठा तब्बल ११ दिवस बंद ठेवण्याचा निर्णय घेण्यात आला आहे. या निर्णयामुळे आधीच तोट्यात असलेल्या कांदा उत्पादक शेतकऱ्यांच्या नुकसानीत आणखी भर पडली आहे, असे तीव्र मत महाराष्ट्र राज्य कांदा उत्पादक शेतकरी संघटनेचे संस्थापक अध्यक्ष भारत दिघोळे यांनी व्यक्त केले आहे.

भारत दिघोळे म्हणाले, “कांदा शेतकरी दिवसरात्र राबून उत्पादन घेतो, आणि त्याचा माल विक्रीसाठी आणल्यावर बाजार बंद असल्याची पाटी त्याच्या तोंडावर आपटली जाते. शेतकऱ्यांना दगड समजून त्यावर चालल्यासारखी वागणूक देणे आता थांबवले पाहिजे. हा प्रकार वर्षानुवर्षे सुरू असून, शेतकऱ्यांना दिवाळीच्या शुभमुहूर्तावरही अन्यायच मिळतो.”

त्यांनी पुढे म्हटले की, “राज्य सरकारने बाजार समित्यांवर शिस्त लावणे अत्यावश्यक आहे. बाजारपेठा कोणाच्या खाजगी मालकीच्या नसून, त्या शेतकऱ्यांच्या श्रम आणि उत्पादनावर उभ्या आहेत. जास्त दिवस बाजार समित्यांमध्ये कांद्याचे लिलाव बंद ठेवणे हे अन्यायकारक आहे लिलाव बंद ठेवण्याचे अधिकार हे सणाचे प्रमुख दिवसांपूरते मर्यादित असावेत आणि शेतकऱ्यांच्या हिताला धक्का पोहोचवणारे निर्णय घेणाऱ्यांवर कारवाई झालीच पाहिजे.”

दिघोळे यांनी मागणी केली की, शासनाने तातडीने या मुद्यावर लक्ष घालून शेतकऱ्यांचे नुकसान भरून काढण्यासाठी ठोस उपाययोजना कराव्यात आधीच शेतकऱ्यांच्या कांद्याला कवडीमोल बाजारभाव मिळत असल्याने शेतकरी मोठ्या प्रमाणात आर्थिक संकटात सापडले आहेत. 

आता एकाच वेळी जास्त दिवस बाजार समित्या बंद राहिल्या तर पुन्हा बाजार समित्या सुरू झाल्यानंतर कांद्याची आवक मोठ्या प्रमाणात वाढून यापेक्षाही कमी दर मिळण्याचे संकटं शेतकऱ्यांवर येईल त्यामुळे राज्य सरकारने कांदा बाजारपेठेचे सुयोग्य नियमन आणि पारदर्शक व्यवहारासाठी ठोस धोरणाची अंमलबजावणी करावी.

वाचा आज काय दर मिळाले? 

बाजार समिती	जात/प्रत	परिमाण	आवक	कमीत कमी दर	जास्तीत जास्त दर	सर्वसाधारण दर
17/10/2025
अकलुज	---	क्विंटल	325	200	1500	900
कोल्हापूर	---	क्विंटल	4172	500	1800	900
चंद्रपूर - गंजवड	---	क्विंटल	520	1500	2500	2000
मुंबई - कांदा बटाटा मार्केट	---	क्विंटल	8428	800	1800	1300
खेड-चाकण	---	क्विंटल	200	600	1400	1100
राहता	---	क्विंटल	5561	400	1600	1000
जुन्नर -आळेफाटा	चिंचवड	क्विंटल	12016	1000	1610	1340
सोलापूर	लाल	क्विंटल	17012	100	2200	900
धुळे	लाल	क्विंटल	1172	600	1100	900
अमरावती- फळ आणि भाजीपाला	लोकल	क्विंटल	449	1000	2000	1500
सांगली -फळे भाजीपाला	लोकल	क्विंटल	5786	500	1800	1150
पुणे- खडकी	लोकल	क्विंटल	24	700	1200	950
पुणे -पिंपरी	लोकल	क्विंटल	11	1200	1500	1350
पुणे-मोशी	लोकल	क्विंटल	621	400	1000	700
इस्लामपूर	लोकल	क्विंटल	150	500	1600	1000
मंगळवेढा	लोकल	क्विंटल	149	100	1400	800
कामठी	लोकल	क्विंटल	52	1540	3040	2290
कल्याण	नं. १	क्विंटल	3	1000	1500	1250
कल्याण	नं. २	क्विंटल	3	500	800	650
येवला	उन्हाळी	क्विंटल	3000	126	1188	750
येवला -आंदरसूल	उन्हाळी	क्विंटल	2500	150	1100	850
कळवण	उन्हाळी	क्विंटल	6950	200	1500	900
मनमाड	उन्हाळी	क्विंटल	3000	200	1210	1000
सटाणा	उन्हाळी	क्विंटल	9025	150	1660	950
पिंपळगाव बसवंत	उन्हाळी	क्विंटल	13300	300	2011	1125
भुसावळ	उन्हाळी	क्विंटल	68	500	1000	800