मोहन बोराडे
परभणी जिल्ह्याच्या सेलू शहरापासून चार किमी अंतरावर असलेल्या रवळगाव येथील शेतकऱ्यांच्या मुलांनी शैक्षणिकदृष्ट्या प्रगती करत प्रशासनातील अनेक पदाला गवसणी घातली आहे. रवळगावने अधिकाऱ्यांचे गाव म्हणून आपली ओळख निर्माण केली आहे.
विशेष म्हणजे, ही सर्व मुले जमीनदारांपासून ते सर्वसामान्य शेतकऱ्यांची मुले आहेत. या गावातील वर्ग एकचे दहा अधिकारी आहेत. तर वर्ग दोनचे बारा अधिकारी असून, ३० डॉक्टर आहेत.
शासकीय नोकरदार तब्बल २०० आहेत. प्रत्येक क्षेत्रात रवळगावच्या भूमिपुत्रांनी आपला दबदबा निर्माण केला आहे. शिक्षणाचे माहेरघर म्हणून सेलू शहराची ओळख आहे. शहरापासून ४ किमी अंतरावर ५ हजार लोकसंख्येचे रवळगाव हे छोटेसे खेडे आहे.
सन १९७० रामराव रोडगे च्या आसपास (विभागप्रमुख, कृषी विद्यापीठ, परभणी) व कै. गोपीनाथराव रोडगे (शिक्षणाधिकारी) हे या गावाचे पहिले अधिकारी होते. त्यानंतर शिक्षणाचा वारसा पुढे चालू राहिला.
गावापासून सेलू तालुक्याचे अंतर ४ किमी असले तरी रस्त्याची सुविधा नव्हती. अनेक विद्यार्थ्यांनी जिल्हा परिषद शाळा खळगाव येथे शिक्षण घेतले. सातवीनंतर पुढील शिक्षणासाठी सेलू येथे पायी किंवा सायकलीवर जावे लागत असे. सर्व विद्यार्थी शेतकऱ्यांची मुले असल्यामुळे परिस्थिती जेमतेमच होती.
आज रवळगावमध्ये ३० डॉक्टर, १३ इंजिनिअर, ५ वकील, ३ सीए, ३० शिक्षक आणि प्राध्यापक, ३ विक्रीकर निरीक्षक, ३ मंत्रालयीन सहायक अधिकारी तसेच महाराष्ट्र लोकसेवा आयोगाच्या परीक्षा पास होऊन उपजिल्हाधिकारी, उपविभागीय कृषी अधिकारी, नगरपरिषद मुख्याधिकारी, वन अधिकारी, पोलिस निरीक्षक, विक्री कर निरीक्षक अशा विविध विभागांत रवळगावच्या सुपुत्रांची निवड झालेली आहे.
कॅनडा, फ्रान्स, जर्मनीत उच्च शिक्षण
• खळगावातील मुलं एवढ्यावरच थांबली नाहीत. कॅनडा, फ्रान्स, जर्मनी येथे उच्च शिक्षण घेऊन परत आपल्या मायदेशी नोकरी करत आहेत.
• तसेच सध्या जर्मनी येथे मुले व रवळगावच्या सुनादेखील इंजिनिअर म्हणून उच्च पदावर काम करीत आहेत.
• ही खळगावसाठी अभिमानाची बाब आहे. याचा पुरेपूर उपयोग रवळगाव येथील विद्यार्थी घेत आहेत.