सोलापूर : अतिवृष्टी, महापूर नुकसानभरपाई तसेच बियाणे खरेदीसाठी मंजूर रकमेपैकी ४ लाख ४४ हजार शेतकऱ्यांची ३९८ कोटी ४८ लाख रुपये अद्याप शेतकऱ्यांच्या खात्यावर जमा झाले नाहीत.
दरम्यान, जमीन खरडून मोठे नुकसान पोहोचलेल्या २० हजार ४०१ शेतकऱ्यांसाठी ५७ कोटी ५९ लाख रुपये मंजुरीचा प्रस्ताव १५ दिवसानंतरही शासनाने मंजूर केला नाही.
जिल्ह्यात सप्टेंबरमध्ये सर्वच नद्यांना महापूर आला. त्यामुळे खरडून माती वाहून गेल्याने मोठे नुकसान झाले. सप्टेंबर अखेरपर्यंत पाऊस, पुरामुळे नुकसानीचे पंचनामे करता आले नाहीत.
ऑक्टोबर महिन्यात पंचनामे पूर्ण करून १४ नोव्हेंबर रोजी जिल्ह्याच्या नुकसानीचा अहवाल शासनाला पाठविला. त्यामध्ये १० तालुक्यातील २० हजार ४४१ शेतकऱ्यांच्या १२ हजार ४६० हेक्टर क्षेत्राचे ५७ कोटी ५९ लाख रुपयांचे नुकसान झाले होते.
या नुकसानग्रस्तांसाठी रक्कम मंजुरीसाठी पाठविण्यात आलेला प्रस्ताव शासनाने अद्याप मंजूर केला नाही. पंधरा दिवसानंतरही शासन खरडून गेलेल्या शेतीचा नुकसानभरपाई आदेश काढला नसल्याने शेतकऱ्यांच्या खात्यावर पैसे कधी जमा होणार ? हा प्रश्न आहे.
अतिवृष्टी व महापुराने नुकसान झालेल्या पिकांसाठी व रब्बी पेरणी बियाणासाठी मंजूरपैकी चार लाख ४४ हजार शेतकऱ्यांच्या खात्यावर ३९८ कोटी ४८ लाख रुपये अद्यापही शेतकऱ्यांच्या खात्यावर जमा झाले नाहीत.
मंजूर रकमेपैकी शेतकऱ्यांच्या खात्यावर जमा झालेली रक्कम अधिक व जमा न झालेली रक्कम कमी असली तरी जमा न झालेल्या शेतकऱ्यांमध्ये आमचे पैसे कधी जमा होणार? अशी विचारणा होत आहे.
३९ दिवसात ६६५ कोटी जमा
◼️ सप्टेंबर महिन्यात झालेल्या पीक नुकसानीसाठी सात लाख ६४ हजार शेतकऱ्यांना ८६७ कोटी ३८ लाख रुपये १८ व २० ऑक्टोबर रोजी मंजूर झाले आहेत.
◼️ मागील ३९ दिवसात (१९ ऑक्टोबर ते २७ नोव्हेंबर) पाच लाख २१ हजार शेतकऱ्यांच्या खात्यावर ६६५ कोटी ३ लाख रुपये जमा झाले.
◼️ रब्बी पेरणीसाठी बियाणे खरेदी व इतर अनुषंगिक खर्चासाठी सात लाख ९२ हजार शेतकऱ्यांना ६५२ कोटी मंजूर असून त्यापैकी पाच लाख ६१ हजार शेतकऱ्यांच्या खात्यावर ४८८ कोटी २३ लाख रुपये जमा झाले आहेत.
अधिक वाचा: ऊस तुटून गेल्यावर पाचट जाळण्यापेक्षा त्यावर 'ही' प्रक्रिया करून बघा; होतील असंख्य फायदे