कोल्हापूर जिल्हा सहकारी दूध उत्पादक संघाने (गोकुळ) म्हैस दूध खरेदी दरात प्रतिलिटर एक रुपयांची, तर गाय दुधासाठी दोन रुपयांची वाढ करण्याचा निर्णय घेतला आहे. 'गोकुळ' दूध संघाच्या या निर्णयाबद्दल कोल्हापूर जिल्हा दूध संस्था कर्मचारी संघटनेच्या वतीने संघाचे अध्यक्ष नविद मुश्रीफ यांचा सत्कार संघटनेचे अध्यक्ष केरबा पाटील यांच्या हस्ते करण्यात आला.
अध्यक्ष मुश्रीफ म्हणाले, उत्पादक हाच गोकुळचा खरा पाया आहे. दूध उत्पादकांची आर्थिक उन्नती साधणे हेच संघाचे मुख्य उद्दिष्ट आहे. संघाशी संलग्न प्राथमिक दूध संस्था आणि त्या संस्थांमध्ये कार्यरत कर्मचारी वर्ग यांचा संघाच्या प्रगतीत मोलाचा वाटा आहे. संघाच्या विविध योजना, अनुदाने आणि उपक्रमांची माहिती प्रत्येक दूध उत्पादकापर्यंत पोहोचविण्याची जबाबदारी कर्मचारी वर्गाने प्रभावीपणे पार पाडावी.
संघाचे ज्येष्ठ संचालक विश्वास पाटील, अरुण डोंगळे, बाबासाहेब चौगले, अजित नरके, बाळासाहेब खाडे, युवराज पाटील, संघटनेचे उपाध्यक्ष शामराव पाटील, सचिव विश्वास पाटील, सुरेश जाधव, तानाजी गुरव, सरदार देसाई, संजय पानारी, मंगेश बेडकळ, रामचंद्र चौगले, शिवाजी शिंदे, सुनील विभूते आदी उपस्थित होते.