Moya Robot : सध्या एआय आणि रोबोटची चर्चा जगभरात सुरू असते. अनेक ठिकाणी तर माणसांच्या जागी रोबोट काम करू लागले आहेत. अशात एक पाऊल पुढे टाकत चीनची रोबोटिक कंपनी DroidUp ने अलिकडेच शांघायमध्ये एक खास ह्यूमनॉइड रोबोट लॉन्च केला, ज्याचं नाव आहे Moya. कंपनीचा दावा आहे की, हा जगातील पूर्णपणे “बायोमिमेटिक एम्बॉडीड इंटॅलिजेंट रोबोट” आहे. म्हणजेच काय तर हा रोबोट माणसांसारखा चालू-फिरू शकतो. इतकंच नाही तर इतरांशी बोलताना डोळ्यात डोळे घालून बोलतो आणि चेहऱ्यावर हलके हावभावही असतात.
एम्बॉडीड AI म्हणजे काय आणि Moya कशी वेगळी आहे
एम्बॉडीड आर्टिफिशियल इंटेलिजन्स (Embodied AI) या संकल्पनेवर Moya तयार करण्यात आली आहे. म्हणजेच ही केवळ डिजिटल जगात काम करणारी प्रणाली नसून, ती वास्तविक जग जाणू शकते, विचार करू शकते आणि त्यानुसार प्रतिक्रिया देऊ शकते. आजूबाजूच्या गोष्टी समजून घेऊन वागणे ही तिची खासियत आहे. त्यामुळेच तिला पारंपरिक रोबोट्सपेक्षा अधिक प्रगत मानले जाते.
चालणे, हसणे आणि मायक्रो-एक्सप्रेशन्सची खासियत
South China Morning Post ने शेअर केलेल्या व्हिडिओमध्ये Moya हसताना, मान हलवताना, डोळ्यांतून संपर्क साधताना आणि माणसांसारख्या चालीनं चालताना दिसते. कंपनीनुसार, Moya माणसांच्या चेहऱ्यावरील अतिशय मायक्रो-एक्सप्रेशन्स देखील हुबेहूब नक्कल करू शकते. यामुळे ती आजवरच्या सर्वात मानवीसदृश दिसणाऱ्या रोबोट्सच्या यादीत समाविष्ट होते.
बांधाही माणसांसारखा
Moya ची उंची साधारण १.६५ मीटर म्हणजे ५.५ फूट असून वजन सुमारे ३२ किलो आहे. तिची रचना प्रौढ माणसाच्या शरीराच्या प्रमाणात केली आहे. विशेष म्हणजे, संवादाच्या वेळी अधिक नैसर्गिक वाटावे यासाठी तिचे शरीराचे तापमान ३२ ते ३६ अंश सेल्सियसदरम्यान ठेवले जाते. कंपनीचा दावा आहे की तिची चाल ९२ टक्क्यांपर्यंत माणसांसारखी अचूक आहे, त्यामुळे हालचाली स्थिर आणि नैसर्गिक दिसतात.
तंत्रज्ञान आणि प्लॅटफॉर्मची माहिती
अहवालांनुसार, Moya ला “Walker 3” नावाच्या चेसिसवर तयार करण्यात आले आहे. मात्र DroidUp ने या प्लॅटफॉर्मबाबत सविस्तर तांत्रिक माहिती जाहीर केलेली नाही. “Walker” हे नाव सामान्यतः UBTECH या कंपनीशी जोडले जाते, पण दोन्ही कंपन्यांमधील कोणताही अधिकृत संबंध अद्याप स्पष्ट झालेला नाही. Moya चे डिझाइन मॉड्युलर असल्याचे सांगितले जाते. म्हणजे बाह्य स्वरूप बदलता येते, पण आतली यंत्रणा तीच राहते.
कुठे वापर होणार आणि किंमत किती
DroidUp, Moya ला केवळ घरगुती कामांसाठीच नाही तर हेल्थकेअर, शिक्षण आणि इतर व्यावसायिक क्षेत्रांत वापरण्याचा विचार करत आहे. जिथे माणूस आणि रोबोट यांच्यात दीर्घकाळ संवाद आवश्यक असतो. औद्योगिक कामे किंवा वेगवान डेमो यांपेक्षा मैत्रीपूर्ण आणि सहज संवादावर तिचा भर आहे. अहवालानुसार, Moya चे बाजारात आगमन २०२६ च्या अखेरीस होऊ शकते आणि तिची सुरुवातीची किंमत सुमारे १२ लाख जपानी येन असू शकते. मात्र मूळ किंमत आणि उपलब्धतेबाबत अधिकृत घोषणा अजून बाकी आहे.
लोकांच्या संमिश्र प्रतिक्रिया
सोशल मीडियावर Moya बद्दल संमिश्र प्रतिक्रिया उमटल्या आहेत. काही लोक तिची बनावट पाहून थक्क आणि उत्साही झाले आहेत, तर काहींना तिची चाल-ढब आणि हावभाव थोडे अस्वस्थ करणारे वाटले. तज्ज्ञ याला “Uncanny Valley” असे म्हणतात. जेव्हा एखादी मशीन जवळजवळ माणसासारखी दिसते, पण पूर्णपणे माणूस नसते, तेव्हा विचित्र भावना निर्माण होते. Moya बाबतही काही लोकांना असा अनुभव आला.