गुरगुट्या भात तूप मेतकूट म्हणजे खाण्याचं सुखच सुख! पाहा खमंग मेतकुटाची अस्सल पारंपरिक रेसिपी

मेतकूट हा महाराष्ट्राचा एक पारंपरिक पदार्थ. लग्नकार्य असलं की आवर्जून मेतकूट केलंच जातं. खमंग मेतकूट गरम भातासोबत तसेच पोळीसोबतही खायला खूप छान लागतं. त्याच मेतकुटाची ही एक पारंपरिक रेसिपी पाहा...

मेतकूट करण्यासाठी चणा डाळ, उडदाची डाळ, मूग डाळ अशा सर्व डाळी एकेक वाटी या प्रमाणात घ्या. सगळ्यात आधी चणा डाळ छान खमंग भाजून घ्या. त्यानंतर ती कढईतून बाहेर काढा.

यानंतर उडीद डाळ, मूग डाळ हे देखील एकेक करून भाजून घ्या.

त्यानंतर ३ ते ४ चमचे गहू घ्या आणि ते देखील व्यवस्थित खमंग भाजून घ्या. पदार्थ भाजून घेताना गॅस नेहमी मंद आचेवर ठेवावा.

त्यानंतर अर्धी वाटी तांदूळ भाजून घ्या. त्यानंतर मेथी दाणे, धणे, जिरे खमंग भाजून घ्या.

भाजून घेतलेले सगळे पदार्थ, चवीनुसार मीठ आणि तिखट तसेच थोडीशी हळद घालून मिक्सरमधून बारीक वाटून घ्या. छान चवदार खमंग मेतकूट तयार.