टपरीवर मिळतो तसा कुरकुरीत ब्रेड पकोडा घरी करण्यासाठी ८ टिप्स-पकोडे कमी तेलकट पण खुसखुशीत

How To Make Crispy Bread Pakoda at Home : बेसनचे बॅटर तयार झाल्यावर त्यात १ चमचा कडकडीत गरम तेल घाला.

हॉटेलमध्ये मिळतो तसा बाहेरून कुरकुरीत आणि आतून चटपटीत असा ब्रेड पकोडा घरी करणं फारचं कठीण नाही. फक्त काही खास युक्त्या वापरल्या की त्याची चव अगदी बाहेरसारखी लागते. (How To Make Crispy Bread Pakoda at Home)

बेसनाचे पीठ जास्त घट्ट नसावे आणि जास्त पातळही नसावे. पीठ ब्रेडला व्यवस्थित चिकटेल इतपत मध्यम हवं. पिठात थोडं तांदळाचं पीठ मिसळल्यास पकोडा जास्त वेळ कुरकुरीत राहतो. (Bread Pakoda Making Tips)

बेसनचे बॅटर तयार झाल्यावर त्यात १ चमचा कडकडीत गरम तेल घाला. यामुळे पकोड्याचे बाहेरचे आवरण खुसखुशीत होते आणि पकोडा जास्त तेल ओढून घेत नाही.

पकोड्यासाठी लागणारी बटाट्याची भाजी जास्त ओलसर नसावी. भाजी करताना त्यात पाण्याचा वापर टाळा. भाजी जितकी सुकी असेल तितकाच ब्रेड मऊ पडणार नाही.

बेसनाच्या पिठात ओवा हातावर चोळून घालावा. यामुळे पचन सुलभ होते आणि चवही वाढते. तसंच बटाट्याच्या भाजीत आलं-लसूण आणि हिरवी मिरची यांचा ठेचा वापरल्यानं हॉटेलसारखा तिखटपणा येतो.

हॉटेलमध्ये ब्रेडच्या एका स्लाईसला हिरवी चटणी आणि दुसऱ्या स्लाईसला चिंच खजूराची चटणी लावली जाते. यामुळे पकोड्याला आंबट गोड असा जबरदस्त स्वाद येतो.

बॅटरमध्ये अगदी चिमूटभर सोडा वापरा, जास्त सोडा झाल्यास पकोडा तेल खेचून घेतो. आणि पकोडे तळण्याच्या अगदी आधी सोडा घालून पीठ नीट फेटून घ्या.

पकोड्यासाठी फ्रेश ब्रेडऐवजी एक दिवस जुना ब्रेड वापरल्यास तो तेल कमी शोषून घेतो. तसंच पकोडा मधून तिरपा कापताना धारदार चाकू वापरा म्हणजे आकार बिघडणार नाही.