संध्याकाळच्या वाफाळत्या चहासोबत आपल्याला सगळ्यांनाच काहीतरी चटपटीत आणि कुरकुरीत खायला हवंच असतं. चहासोबत, आपण नेहमीच कांदा भजी किंवा बटाटा वडा खातो, पण नेहमी चहासोबतच तेच ते पदार्थ खाऊन आपल्याला अनेकदा कंटाळा येतो. अशावेळी चविष्ट, झटपट आणि पौष्टिक असा स्नॅक म्हणजे मूग डाळ कोळीवाडा...बाहेरून कुरकुरीत, खुसखुशीत आणि आतून मऊ असलेला हा पदार्थ चवीला जितका भन्नाट तितकाच आरोग्यदायीही आहे. खास मसाल्यांचा सुगंध आणि मूग डाळीची पौष्टिकता यामुळे ही रेसिपी लहानांपासून मोठ्यांपर्यंत सगळ्यांचीच आवडती ठरते(How To Make Moong Dal Koliwada).
'कोळीवाडा' स्टाईल म्हटलं की डोळ्यासमोर येते ती म्हणजे लालभडक रंग, बाहेरून अतिशय कुरकुरीत आणि आतून मऊ अशी चविष्ट डिश! मूग डाळीचा कोळीवाडा हा तितकाच चवदार आणि प्रोटीनने युक्त असा पदार्थ आहे. मूग डाळ फक्त वरण किंवा खिचडीसाठीच नाही तर त्याचा असा चमचमीत, चटपटीत पदार्थ तयार होतो की (Moong Dal Koliwada) चव तर भन्नाटच लागते... घरच्या घरी अगदी सोप्या पद्धतीने गरमागरम मूग डाळ कोळीवाडा (Yellow Moong Dal Koliwada Recipe) कसा तयार करायचा, त्यासाठी लागणारे साहित्य आणि परफेक्ट रेसिपी पाहूयात...
साहित्य :-
१. पिवळी मूग डाळ - २ कप (६ ते ७ तास पाण्यांत भिजवलेली)
२. आलं, लसूण, मिरचीची पेस्ट - १ टेबलस्पून
३. मीठ - चवीनुसार
४. हळद - १/२ टेबलस्पून
५. काळीमिरी पूड - १/२ टेबलस्पून
६. लाल तिखट मसाला - १/२ टेबलस्पून
७. गरम मसाला - १/२ टेबलस्पून
८. चाट मसाला - १/२ टेबलस्पून
९. धणेपूड - १/२ टेबलस्पून
१०. पांढरे तीळ - १ टेबलस्पून
११. तेल - तळण्यासाठी
१२. पाणी - गरजेनुसार
१३. कोथिंबीर - २ टेबलस्पून (बारीक चिरलेली)
१४. बेसन - २ ते ३ टेबलस्पून
१५. तांदुळाचे पीठ - २ ते ३ टेबलस्पून
कृती :-
१. सर्वातआधी एका मोठ्या बाऊलमध्ये ६ ते ७ तास पाण्यात भिजवलेली पिवळी मूग डाळ घेऊन त्यात आलं, लसूण, मिरचीची पेस्ट घालावी.
२. याच मिश्रणात मग चवीनुसार मीठ, हळद, काळीमिरी पूड, लाल तिखट मसाला, गरम मसाला, चाट मसाला, धणेपूड, पांढरे तीळ, बारीक चिरलेली कोथिंबीर, बेसन, तांदुळाचे पीठ, तेल व गरजेनुसार पाणी घालून सगळे जिन्नस चमच्याने कालवून एकजीव करून घ्यावेत.
३. कढईत तेल घेऊन ते व्यवस्थित गरम करून घ्यावे. या गरम तेलात तयार मिश्रणाच्या छोट्या - छोट्या भाज्या सोडून हलका गोल्डन ब्राऊन रंग येईपर्यंत आणि कुरकुरीत होईपर्यंत खरपूस तळून घ्याव्यात.
गरमागरम मूग डाळ कोळीवाडा खाण्यासाठी तयार आहे. हिरवी चटणी किंवा सॉससोबत ही मूग डाळ कोळीवाडा स्पेशल डिश खाण्यास अप्रतिमच लागते.