भारतात घरोघरी सकाळी चहा होतोच. करायची पद्धत आणि प्यायचे प्रमाण वेगवेगळे असले तरी चहा घरी होतोच. काही दुधाचा घेतात काहींना लिंबाचा आवडतो तर काही साधा कोराच पितात. चहा पूड एकदा उकळली की ती आपण फेकून देतो. मात्र ही चहापूड खरंतर फार उपयुक्त असते. दररोज घरात बनणाऱ्या चहानंतर उरलेली चहापूडी आपण सरळ फेकून देतो. पण हीच चहापूडी अनेक घरगुती कामांसाठी खूप उपयोगी ठरू शकते. (Don't throw away used tea powder after straining tea! 3 solutions - from hair to garden plants, use it again )थोडी कल्पकता वापरली तर तिचा पुन्हा वापर करून आपण पर्यावरणाचीही काळजी घेऊ शकतो आणि घरातील काही छोट्या समस्या सोडवू शकतो.
उरलेली चहापूडी झाडांसाठी अतिशय फायदेशीर मानली जाते. ती मातीमध्ये मिसळल्यास झाडांना नैसर्गिक पोषण मिळते आणि मातीचा दर्जा सुधारतो. विशेषतः कुंड्यांतील झाडांसाठी ती चांगले खत ठरते. मात्र वापरण्यापूर्वी चहापूडी नीट धुवून आणि वाळवून वापरावी, म्हणजे साखर किंवा दूधामुळे किडे होणार नाहीत.
डोळ्यांखालील काळी वर्तुळे आणि सूज कमी करण्यासाठीही चहापूडी उपयोगी आहे. वापरलेली चहापूडी किंवा टी बॅग थंड करून डोळ्यांवर ठेवली तर डोळ्यांना थंडावा मिळतो आणि थकवा कमी होतो. हा एक सोपा आणि नैसर्गिक उपाय आहे. विकतच्या महाग टी बॅग आणण्यापेक्षा घरीच तयार करा.
केसांसाठीही चहापूडीचा वापर केला जातो. उकळलेल्या चहाच्या पाण्याने केस धुतल्यास केसांना नैसर्गिक चमक येते आणि केस मऊ होतात. काही जण केसांना थोडासा गडद रंग यावा म्हणूनही हा उपाय करतात. हा रसायनमुक्त पर्याय असल्याने केसांसाठी सुरक्षित मानला जातो.
याशिवाय चहापूडीचा वापर घरातील दुर्गंधी कमी करण्यासाठीही करता येतो. वाळवलेली चहापूडी एखाद्या छोट्या कापडी पिशवीत ठेवून ती फ्रिज, शू रॅक किंवा कचरापेटीजवळ ठेवली तर वास कमी होतो. तसेच भांडी किंवा तेलकट पृष्ठभाग स्वच्छ करण्यासाठीही चहापूडी हलक्या स्क्रबप्रमाणे वापरता येते. त्यामुळे चहा पूड अशीच फेकून देण्याऐवजी या प्रकारे वापरा.