नवीन वर्षात मराठी चित्रपटही होतील 'बोल्ड'

 मराठी चित्रपटाने सामाजिक, विनोदी, सस्पेंस, थ्रिलर या सर्व जॉनर्समध्ये आघाडी घेतलीच आहे. आता बोल्ड चित्रपटांच्या यादीतही आपले नाव कोरायला सुरुवात केली आहे. इतकी वर्षे किसींग सीन्स वगैरे हिंदी आणि इतर भाषिक चित्रपटांमध्येच पाहायला मिळत असत. मात्र, गेल्या काही वर्षांत मराठी चित्रपटातही किसींग सीन्स हे कथेची गरज म्हणून घेतले जात आहेत. तर काही चित्रपटात कथेची गरज नसतानाही इन्टिमेट सीन्स दाखवण्याची पद्धत सुरू झाली आहे. आता हेच पाहा ना, नो एंट्री..पुढे धोका आहे, या चित्रपटात सई ताम्हणकरला बिकनी घातलेली दाखवण्यात आले आहे. हे चित्र मराठी चित्रपटात पहिल्यांदाच पाहायला मिळाले आणि मराठी प्रेक्षकही आश्‍चर्यचकित झाला. त्यामुळे मराठी चित्रपट हळूहळू बोल्ड होण्याकडे घोडदौड करत आहेत असेच म्हटले पाहिजे. त्यात गैर असे काहीच नाही. सांगायचा मुद्दा एवढाच, की बॉलिवूडकरांना मराठीची भुरळ पडत असतानाच मराठी चित्रपटही अजून एक पाऊल पुढे टाकू पाहात आहे. आज सर्वांसाठी जसे नवीन वर्ष सुरू होत आहे तसेच चित्रपटांसाठीही हे नवीन वर्ष आशा, अपेक्षांनी भरलेले आहे. या नवीन वर्षात तरी चित्रपटात बोल्डचा पडत असलेला हा पायंडा थांबेल आणि त्यापेक्षा नवीन काहीतरी प्रेक्षकांना पाहायला मिळेल, अशी आशा करूयात. कारण आज वेगळ्या विषयांच्या हाताळणीमुळे मराठी चित्रपटाचे नाव मोठे झाले आहे. यापुढील काळात त्याची वेगळी ओळख निर्माण होऊ नये म्हणजे झाले. मराठीत आलेल्या बोल्ड सीन्सबद्दल सीएनएक्सने घेतलेला आढावा.. जबरदस्त : पुष्कर जोग आणि मानसी नाईक असलेल्या 'जबरदस्त' या चित्रपटाचे महेश कोठारे यांनी दिग्दर्शन केले होते. हा चित्रपट २00७ मध्ये प्रदर्शित झाला होता. या चित्रपटात गाण्यामध्ये किसींग सीन दाखवला होता. मात्र, तो पूर्णपणे न दाखवता त्याची आयडिया येईपर्यंतच किसींग सीनचे दृश्य दाखवले होते. परतु : खर्‍या घटनेवर आधारित 'परतु' या चित्रपटाचे दिग्दर्शन नितीन अडसूळ यांनी केले होते. राजस्थानमधून मुंबई पाहायला आलेला मुलगा परतीच्या प्रवासाला निघालेला असताना हरवतो आणि नगर जिल्हय़ातील एका शेतकर्‍याला सापडतो. तिथेच तो वाढतो, त्याचे लग्न होते आणि नंतर त्याच्या खर्‍या आई-वडिलांचा शोध लागतो. या वेळी जीव पिसाटला गाण्यामध्ये सौरभ गोखले आणि गायत्री सोहम यांचे लग्नानंतरच्या दिवसांतील बोल्ड सीन दाखवण्यात आले आहेत. जोगवा : जोगतीणींच्या आयुष्यावर तयार केलेल्या 'जोगवा' या चित्रपटाला अनेक पुरस्कारांनी गौरवण्यात आले होते. २00९ मध्ये प्रदर्शित झालेल्या या चित्रपटात प्रथमच किसींग सीन दाखवण्यात आला होता. या चित्रपटातील अभिनयासाठी अभिनेता उपेंद्र लिमयेला उत्कृष्ट अभिनेत्याचा राष्ट्रीय पुरस्कार मिळाला होता. राष्ट्रीय पुरस्कारांसह अनेक पुरस्कारांवर या चित्रपटाने मोहोर उमटवली होती.टाईम प्लीज : छोट्या आणि मोठय़ा पडद्यावर दिसणार्‍या आणि खर्‍या आयुष्यातही जोडीदार झालेल्या अभिनेता उमेश कामत आणि अभिनेत्री प्रिया बापट यांनी 'टाईम प्लीज' चित्रपटात एकत्र काम केले आहे. या चित्रपटात या दोघांचा किसींग सीन पाहायला मिळाला होता. 'नवा गडी नवं राज्य' या नाटकावर आधारित हा चित्रपट २0१३ मध्ये तयार क रण्यात आला होता. एका जनरेशनची गॅप असलेल्या नवरा-बायकोतील नाते प्रेम, भांडण या वळणांवरून मैत्रीचे नाते तयार होते.दुभंग, अनवट : आदिनाथ कोठारे आणि ऊर्मिला कानिटकर या रिअल लाईफ पार्टनर्सनी 'दुभंग' चित्रपटामध्ये बोल्ड सॉंग केले होते. इतकेच नाही तर २0१४ मध्ये प्रदर्शित झालेल्या 'अनवट' या चित्रपटात या दोघांचा किसींग सीन दाखवण्यात आला होता. गजेंद्र अहिरेंनी चित्रपटाचे दिग्दर्शन केले होते. तर दुभंग चित्रपट महेश कोठारेंनी स्वत: दिग्दर्शित केला होता. हे दोन्ही चित्रपट विशेष चालले नाहीत, पण या बोल्ड सीन्समुळे चित्रपटांची बरीच चर्चा झाली होती.