Siddheshwar Dam Water Release : पावसामुळे मराठवाड्यातील धरणसाठ्यांत लक्षणीय वाढ झाली असून, सिद्धेश्वर धरण आता शंभर टक्के क्षमतेने भरले आहे. (Siddheshwar Dam Water Release)
त्यामुळे धरणाची पाणीपातळी नियंत्रित ठेवण्यासाठी २८ ऑक्टोबर रोजी दुपारी सिद्धेश्वर धरणाचे दहा दरवाजे उघडण्यात आले आहेत. या दरवाज्यांमधून ८ हजार २३४ क्युसेक्स पाण्याचा विसर्ग पूर्णा नदीपात्रात करण्यात येत आहे. (Siddheshwar Dam Water Release)
धरणसाठा शंभर टक्के
गेल्या काही दिवसांपासून येलदरी धरणाच्या पाणलोट क्षेत्रात झालेल्या पर्जन्यवृष्टीमुळे त्या धरणातही जलसाठा वाढला आहे. त्यामुळे २७ ऑक्टोबर रोजी येलदरी धरणाचे दोन दरवाजे उघडण्यात आले, तसेच विद्युत निर्मितीद्वारेसुद्धा पाण्याचा विसर्ग सुरू करण्यात आला आहे.
या पाण्याचा थेट परिणाम सिद्धेश्वर धरणावर झाला असून, धरणातील पाण्याची पातळी झपाट्याने वाढली आहे. त्यामुळे धरण ओसंडून वाहू नये म्हणून नियंत्रित स्वरूपात विसर्ग करण्याचा निर्णय जलसंपदा विभागाने घेतला.
नदीकाठच्या गावांना सतर्कतेचे आवाहन
सिद्धेश्वर धरणातून सोडण्यात आलेल्या पाण्यामुळे पूर्णा नदीपात्रातून पाण्याचा प्रवाह वाढत आहे. परिणामी नदीकाठच्या गावांमध्ये पाणीपातळी वाढण्याची शक्यता आहे. या पार्श्वभूमीवर जलसंपदा विभागाने नागरिकांना सतर्क राहण्याचे आवाहन केले आहे.
सिद्धेश्वर धरणाचे दहा दरवाजे एक फूट उचलण्यात आले असून, पाण्याचा विसर्ग नियंत्रित पद्धतीने सुरू आहे. नागरिकांनी नदीकाठच्या भागात जाणे टाळावे व प्रशासनाच्या सूचनांचे पालन करावे.- सय्यद खालिद, उपविभागीय अभियंता
सध्याची स्थिती
धरण: सिद्धेश्वर
पाणीपातळी: १००% उपयुक्त साठा
उघडलेले दरवाजे: १०
विसर्ग: ८,२३४ क्युसेक्स
नदी: पूर्णा
नागरिकांना सूचना
नदीकाठच्या गावांनी सतर्क राहावे.
नदीपात्रात अनावश्यकपणे जाणे टाळावे.
प्रशासनाच्या सूचनांकडे दुर्लक्ष करू नये.
शेतकऱ्यांनी नदीकाठच्या शेतीतील जनावरे आणि साहित्य सुरक्षित ठिकाणी हलवावे.
सिद्धेश्वर धरणाच्या पाणलोट क्षेत्रात झालेल्या पावसामुळे धरणसाठा शंभर टक्क्यांवर पोहोचला आहे. यामुळे धरण व्यवस्थापनासाठी दरवाजे उघडण्याचा निर्णय घेतला गेला आहे.
आता पूर्णा नदीकाठच्या गावांनी सतर्क राहणे अत्यावश्यक आहे, कारण पुढील काही दिवसांत विसर्ग कायम राहण्याची शक्यता आहे.