सोलापूर : पानी फाउंडेशन श्रमदानाच्या चळवळीत एकत्र आलेल्या शेतकऱ्यांनी 'फार्मर कप'साठीही तशीच एकी ठेवली.
गावाच्या शिवारात सुमारे ४०० एकरावर तुरीचे उत्पादन ठिबक सिंचनाद्वारे घेतल्याने एक नव्हे दोन नव्हे तर अनेक शेतकऱ्यांना चांगले पैसे मिळत आहेत.
अतिशय कमी खर्चात अधिक तूर उत्पादनाचा 'सुर्डी' पॅटर्न राज्यासाठी आदर्श ठरत आहे. इथले तूर बियाणे २०० रुपये किलोप्रमाणे विक्री होत आहे.
एकरी १२ हजार रुपयांपर्यंत तूर पीक घेण्यासाठी खर्च होतो. कमीत कमी १२, तर सर्वाधिक १८ क्विंटल उतारा पडतो.
पाच-साडेपाच महिन्यात निघणाऱ्या तुरीचा खर्चवजा जाता कमीत कमी ६५ ते ७० हजार रुपये शिल्लक राहतात असे येथील शेतकऱ्यांनी सांगितले.
मागील चार-पाच वर्षापासून शेतकऱ्यांच्या एकजुटीमुळे सुर्डी गाव राज्यभरात चर्चेत आहे. आज बाजारात खरीप हंगामात विविध बियाणांच्या विक्रीसाठी जाहिरात करावी लागत आहे.
मात्र सुर्डी येथील विजेता शेतकरी गटातील शेतकऱ्यांचे तुरीचे बियाणे विविध गावचे शेतकरी गावात येऊन घेऊन जातात.
एकवेळ कंपनीच्या बियाणांवर शेतकरी अविश्वास दाखवतील मात्र सुर्डी येथील बियाणे विश्वासाने घेऊन जातात, असे धनाजी शेलके यांनी सांगितले.
कीडनाशक म्हणून निंबोळीचा अर्क..
◼️ मागील वर्षी ३५ क्विंटल तूर, तर यावर्षी २६ क्विंटल तूर बियाणे विक्री झाल्याचे धनाजी शेळके यांनी सांगितले.
◼️ दोनशे रुपये किलो दराने तूर बियाणे विक्री होते. एका क्विंटलचे २० हजार रुपये होतात अन् गावातच बियाणे विक्री होत असल्याने कसलाही खर्च नाही.
◼️ गावात पुरुष व महिला शेतकरी गट आहेत. पेरणीस तयार केलेल्या जमिनीवर गटाचे शेतकरी एकत्रित येत ७ फूट अंतरावर ठिबक पाइप अंतरतात.
◼️ सव्वा फूट अंतरावर ड्रीपरच्या उजव्या व डाव्या बाजूला बियाणे टोकण केले जाते. चांगली उगवण झाली की एक चांगले रोप ठेवून एक रोप काढले जाते.
◼️ ठिबक पाइप अंतरणे, बियाणे टोकण, ४० ते ४५ दिवसाने शेंडा खुडणी व काढणी ही कामे गटातील सर्व शेतकरी दररोज सकाळी करतात.
◼️ दशपर्णी अर्क, निंबोळी अर्क (गरज पडली तर कीटकनाशक) च्या महिन्यातून तीन फवारण्या किडीचा प्रादुर्भाव असो अथवा नसो केल्या जातात.
◼️ शिवारात कुठेही कडुलिंबाची झाडे असतात. अशा निंबोळ्या गोळा करून वाळवून ठेवल्या तर घरीच निंबोळी अर्क तयार करता येतो.
◼️ हा अर्क कीड नाशकासाठी प्रभावी ठरतो. यामुळे बाजारातून अर्कसाठी खर्च करायची आवश्यकता नाही. शेतकऱ्यांचे यामुळेही पैसे वाचतात. सुर्डीचे बहुतेक शेतकरी हेच करतात.
अधिक वाचा: शेतकऱ्यांच्या नुकसान भरपाईचा मार्ग मोकळा; पीकविमा योजनेचा शेवटचा हप्ता लवकरच