वर्धा : 'मागेल त्याला सौर कृषी पंप' योजनेचा लाभ घेताना किंवा देखभाल करताना येणाऱ्या अडचणी सोडवण्यासाठी महावितरणने एक पाऊल उचलले आहे. शेतकऱ्यांना आता कार्यालयांचे उंबरठे झिजवण्याची गरज नसून, घरबसल्या एका क्लिकवर आपल्या तक्रारींचे निवारण करता येणार आहे.
सौर कृषी पंप बसवताना विलंब होत असेल किंवा सुरू असलेल्या पंपात तांत्रिक बिघाड झाला असेल, तर आता थेट ऑनलाइन दाद मागता येईल. महावितरणने यासाठी विशेष 'तक्रार निवारण पोर्टल' सज्ज केला असून, तक्रारीचा मागोवा घेण्याची सोयही उपलब्ध करून दिली आहे.
तक्रार नोंदविण्याची सोपी प्रक्रिया
शेतकऱ्यांना आपली तक्रार नोंदवण्यासाठी महावितरणच्या www.mahadiscom.in या अधिकृत संकेतस्थळावर जावे लागेल. त्यावरील होमपेजवर असलेलेल्या 'मागेल त्याला सौर कृषी पंप योजना' या टॅबवर करून तक्रार नोंदवता येईल.
तक्रार नोंदवताना आपला लाभार्थी क्रमांक किंवा मोबाइल क्रमांक किंवा जिल्हा, तालुका, गाव आणि लाभार्थ्यांचे नाव टाकून शोधा व त्यानंतर आपली समस्या सविस्तर लिहा किंवा तक्रारीच्या स्थितीचा आढावा, देखील याच पोर्टलवर पाहू शकता.
लाभ घेण्याचे आवाहन
शेतकरी बांधवांनी कोणत्याही अफवांना बळी न पडता, तांत्रिक अडचणींसाठी या ऑनलाइन सुविधेचा लाभ घ्यावा आणि ज्यांनी अजून अर्ज केला नाही, त्यांनी त्वरित 'मागेल त्याला सौर कृषी पंप' योजनेचा लाभ घेऊन आपली शेती समृद्ध करावी, असे आवाहन महावितरणतर्फे करण्यात आले आहे.