सन २०२३ या खरीप हंगामातील कापूस व सोयाबीन उत्पादक शेतकऱ्यांना अर्थसहाय्य देण्यासाठी योजनेअंतर्गत रु. ५०००/- प्रति हेक्टर प्रमाणे अर्थसहाय्य कमाल २ हेक्टरच्या मर्यादेत देण्यात येत आहे.
अनुदानासाठी कोण पात्र?
१) यासाठी खरीप २०२३ मध्ये ई-पिक पहाणी केलेले कापूस/सोयाबीन उत्पादक शेतकरी.
२) ज्या शेतकऱ्यांनी खरीप २०२३ मध्ये ई-पिक पहाणी पोर्टलवर नोंद केलेली नाही तथापि ज्यांच्या खरीप २०२३ च्या ७/१२ उताऱ्यावर कापूस किंवा सोयाबीन पिकाची नोंद आहे असे खातेदार.
३) खरीप २०२३ कापूस/सोयाबीन उत्पादक वनपट्टेधारक खातेदार व चंद्रपुर जिल्ह्यातील जिवती तालुक्यातील Non digitalised villages मधील खरीप २०२३ कापूस/सोयाबीन उत्पादक वैयक्तिक व सामाईक खातेदार पात्र आहेत.
पात्र शेतकऱ्यांनी अनुदान मिळण्यासाठी काय करावे?
१) पात्र शेतकऱ्यांनी ई-पिक पहाणी पोर्टलवरील यादीत आपले नाव असलेबाबत खातरजमा पोर्टलवर किंवा संबंधित कृषि सहाय्यक यांचेकडून करुन घ्यावी.
२) तसेच ज्या शेतकऱ्यांनी खरीप २०२३ मध्ये ई-पिक पहाणी पोर्टलवर नोंद केलेली नाही तथापि ज्यांच्या खरीप २०२३ च्या ७/१२ उताऱ्यावर कापूस किंवा सोयाबीन पिकाची नोंद आहे, अशा शेतकऱ्यांनी व चंद्रपुर जिल्ह्यातील जिवती तालुक्यातील Non Digitalised Villages मधील खरीप २०२३ कापूस/सोयाबीन उत्पादक शेतकऱ्यांनी आपल्या गावातील संबंधित तलाठी यांचेशी संपर्क साधावा.
३) खरीप २०२३ कापूस/सोयाबीन उत्पादक वनपट्टेधारक खातेदार यांनी तहसिल/जिल्हाधिकारी कार्यालयाशी संपर्क साधावा.
तरी वर नमूद केल्याप्रमाणे सर्व पात्र शेतकऱ्यांना आवाहन करण्यात येते की, अर्थसहाय्य योजनेचा लाभ घेण्यासाठी वैयक्तिक खातेदारांना आपले आधार संमती व सामाईक खातेदारांना आधार संमतीसह ना हरकत प्रमाणपत्र दि. २८.०२.२०२५ पर्यंत संबंधित कृषि सहाय्यक यांचेकडे सादर करणे आवश्यक आहे.
आधार संमती व ना हरकत प्रमाणपत्राचा नमूना कृषि सहाय्यक यांचेकडे उपलब्ध आहे. विहीत मुदतीत आधार संमती व ना हरकत प्रमाणपत्र कृषि विभागास प्राप्त न झाल्याने लाभार्थी अर्थसहाय्यापासून वंचित राहणार नाही, याची दक्षता घ्यावी.
अधिक माहितीसाठी नजिकच्या विभागीय कृषि सह संचालक/जिल्हा अधिक्षक कृषि अधिकारी/उपविभागीय कृषि अधिकारी/तालुका कृषि अधिकारी कार्यालयाशी संपर्क साधावा.
अधिक वाचा: Namo Shetkari Hapta : नमो शेतकरीच्या ६ व्या हप्त्याचा निर्णय झाला; हप्ता मिळणार का? वाचा सविस्तर