सारा अली खान, बॉलीवूडच्या नव्या पिढीतलं एक दमदार नाव. सैफ अली खान आणि त्याची पहिली पत्नी अमृता सिंग यांची लेक म्हणजे सारा अली खान. आई आणि वडील या दोघांचंही सौंदर्य सारामध्ये पुरेपुर उतरलं आहे. पतौडी घराण्याची राजकुमारी असणारी सारा दिसायलाही अतिशय लोभसं. तिचं वागणं आणि बोलणंही तिच्या एवढंच सुंदर आहे, असं साराला जवळून ओळखणारे अनेक जण सांगतात. आता सध्या सोशल मिडियावर प्रचंड चर्चा सुरु आहे, ती साराच्या कलरफुल साडीची.
साराची ब्यूटीफुल साडी पाहून चाहते तिच्यावर फिदा झाले आहे. सारा अली खानने तिचे फोटो नुकतेच सोशल मिडियावर शेअर केले आहेत. साराने नेसलेली साडी अतिशय सुंदर तर आहेच, पण त्यासोबतच सगळ्यात जास्त चर्चा होत आहे, ती तिच्या साध्या, सोज्वळ पण तेवढ्याच स्टनिंग लूकची. साराचा हा लूक कोणत्याही तरूण मुलीला आवडणारा असून तो तुम्ही एखाद्या कार्यक्रमात किंवा सणावाराला नक्कीच करू शकता. 'Because women in a SariAre always Pyaari' अशी कॅप्शनही साराने या फोटाेंना दिली आहे.
आहे कशी साराची साडी?साराने नेसलेली साडी डार्क पिंक रंगाची आहे. साराच्या गोऱ्या रंगाला ती साडी अधिकच शोभून दिसते आहे. डार्क पिंक कलरच्या साडीचे काठ फारसे मोठे नसून ते पिवळ्या रंगाचे आहेत. त्यावर साराने बेबी पिंक रंगाचे स्लिव्हलेस ब्लाऊज घातले आहे. साराची ही साडी प्रिंटेड पाॅलिस्टर प्रकारातली असून साडीवर अनेक ब्राईट रंग वापरण्यात आले आहेत. पाहताक्षणी ही साडी बांधणीच्या साडीशी मिळतीजुळती वाटते, पण प्रत्यक्षात त्यापेक्षाही खूपच वेगळी आहेत. निळा, पिवळा, बेबी पिंक, लाल असे अनेक रंग या साडीमध्ये असून ब्राईट रंग आवडणाऱ्या महिलांना ही साडी विशेष आवडणारी आहे.
असा आहे साराचा लूकसाराने घातलेली ज्वेलरी देखील अतिशय हटके लूक देणारी आहे. साराने हातात गुलाबी आणि पिवळ्या मॅट फिनिशिंग असणाऱ्या हातभर बांगड्या घातल्या आहेत. गोल्डन रंगातले कानातले झुमके बऱ्यापैकी मोठे आहेत. यामुळे गळ्यात काही विशेष घालण्याची गरज वाटत नाही. याशिवाय नाकात साराने छोटीशी खड्याची मोरणी घातली असून यामुळे तिचे चाफेकळी नाक अधिकच धारदार दिसत आहे.
निळ्या रंगाची बारीक टिकली साराचे सौंदर्य खुलविणारी आहे. अशाप्रकारे छान सजलेल्या साराचे फोटो पाहून तिचे चाहते तिच्यावर फिदा झाले आहेत. साराचे फोटो पाहिल्यानंतर स्क्रिन स्क्राेल करणेच विसरुन गेलो आणि तिचे फोटो पाहत बसलो, असेही तिच्या एका चाहत्याने कमेंटमध्ये लिहिले आहे.