Mamta Mohandas : दोनदा कॅन्सरशी झुंज, लग्न मोडलं, विटिलिगोचा विळखा; सुंदर अभिनेत्रीचा संघर्षमयी प्रवास

Mamta Mohandas : ममताच्या आयुष्यात आरोग्यासंबंधित अनेक मोठ्या समस्या आल्या.

फिल्म इंडस्ट्रीत नशिबाची भूमिका खूप महत्त्वाची असते आणि अभिनेत्री-गायिका ममता मोहनदास याचं एक उदाहरण आहे. ममताला आयुष्यात अनेक संकटांचा सामना करावा लागला. दोनदा कॅन्सरशी झुंज, लग्न मोडलं आणि त्यानंतर विटिलिगो (कोड) या आजाराने ग्रासलं.

ममता मोहनदासचा जन्म बहरीनमध्ये झाला. शिक्षणासाठी ती भारतात आली, जिथे २१ व्या वर्षी तिला मल्याळम चित्रपट 'मयूखम' (२००५) मध्ये लीड रोलची ऑफर मिळाली. या चित्रपटाचे दिग्दर्शक टी. हरिहरन हे मल्याळम चित्रपटसृष्टीतील मोठं नाव आहेत.

सहा वर्षांच्या दीर्घ विश्रांतीनंतर ते या चित्रपटाद्वारे पुनरागमन करत होते आणि त्यांनी ममता व सायजू कुरुप या नव्या कलाकारांना संधी दिली. चित्रपट बॉक्स ऑफिसवर यशस्वी झाला नाही, तरीही ममताच्या अभिनयाचं समीक्षकांनी कौतुक केलं. या चित्रपटाने तिच्या करिअरला एक नवी दिशा दिली.

'मयूखम'नंतर ममताने ममूटी यांच्या 'बस कंडक्टर'मध्ये छोटी भूमिका केली. त्यानंतर तिने 'लंका' (२००६) मध्ये सुरेश गोपींसोबत काम केलं, जे तिच्यापेक्षा २७ वर्षांनी मोठं होते. त्याच वर्षी ती मोहनलाल यांच्यासोबत 'बाबा कल्याणी'मध्ये दिसली. या चित्रपटांनी तिला अपेक्षित ओळख मिळवून दिली नाही.

ममताला खरी प्रसिद्धी मिळाली ती ममूटी यांच्या ऐतिहासिक 'बिग बी' (२००७) चित्रपटामुळे. ममता एक उत्तम गायिका देखील आहे. तिने तेलगू चित्रपटांत गाणी गायल्यानंतर थलपती विजयच्या 'विल्लू' (२००९) चित्रपटातील 'डॅडी मम्मी' या ब्लॉकबस्टर गाण्याने तिला घराघरात पोहोचवलं.

ममताच्या आयुष्यात आरोग्यासंबंधित अनेक मोठ्या समस्या आल्या. २००९ मध्ये तिला हॉजकिन लिम्फोमा (कॅन्सर) झाल्याचं निदान झालं. उपचारानंतर दीड वर्षात ती कॅन्सरमुक्त झाली.

नोव्हेंबर २०११ मध्ये तिने आपला बालपणीचा मित्र आणि बहरीनचा बिझनेसमन प्रेगिथ पद्मनाभन याच्याशी लग्न केलं. मात्र हे लग्न वर्षभरही टिकलं नाही आणि डिसेंबर २०१२ मध्ये त्यांनी वेगळे होण्याचा निर्णय घेतला.

याच काळात २०१३ मध्ये तिचा कॅन्सर पुन्हा बळावला, कारण तिचे 'बोन मॅरो ट्रान्सप्लांट' अयशस्वी झालं होतं. तिने हार न मानता लॉस एंजेलिसमध्ये उपचार घेतले.

पुढे २०२३ मध्ये ममताला विटिलिगो (कोड) हा ऑटोइम्यून आजार झाला, ज्यामुळे त्वचेचा रंग बदलू लागला. इतके होऊनही तिने सकारात्मकता सोडली नाही आणि सोशल मीडियावर आपल्या आजाराबद्दल माहिती दिली.

ममता मोहनदास लैंगिक छळाच्या प्रकरणांवरील तिच्या वादग्रस्त विधानामुळेही चर्चेत आली होती. तिने एका मुलाखतीत म्हटलं होतं की, जर एखादी महिला संकटात सापडते, तर कोठेतरी ती स्वतःही त्याला जबाबदार असते. या विधानामुळे तिला लोकांच्या रोषाला सामोरं जावं लागलं होतं.

कॅन्सर आणि इतर आरोग्याच्या समस्या असूनही ममताने आतापर्यंत ४५ चित्रपटांमध्ये काम केलं आहे. तिचे महाराजा, ओट्टा, बांद्रा, जन गण मन, थिरप्पू, लालबाग हे चित्रपट विशेष गाजले.

सध्या ममता मोहनदास 'माय डिअर सिस्टर' या चित्रपटावर काम करत आहे. ममताची गोष्ट ही संकटांशी धैर्याने लढणाऱ्या एका कलाकाराची प्रेरणादायी गोष्ट आहे.