घरच्याघरी फेशियल करण्याची सगळ्यात सोपी पद्धत- ट्राय करून पाहा, दसऱ्याच्या दिवशी चेहरा चमकेल

दसरा आता अवघ्या २ दिवसांवर आलेला आहे. पण तरीही बऱ्याच जणींच्या घरी नवरात्र बसलेलं असल्याने त्यांना फेशियल, क्लिनअप करून घेण्यासाठी पार्लरला जाणं होत नाही.

दसऱ्याच्या दिवशी आपणही छान दिसावं असं वाटत तर असतं, पण चेहरा खूप टॅन झालेला असतो. डेडस्किन, ब्लॅकहेड्स, व्हाईट हेड्सही खूप वाढलेले असतात.

अशावेळी टॅनिंग, डेडस्किन, ब्लॅकहेड्स, व्हाईटहेड्स कमी करण्यासाठी घरच्याघरी अतिशय सोप्या पद्धतीने फेशियल करून पाहा. ते नेमकं कसं करायचं ते पाहूया...

यासाठी सगळ्यात आधी १ चमचा कच्चं दूध आणि अर्धा चमचा दही घ्या. या मिश्रणामध्ये कापूस बुडवा आणि त्याने सगळा चेहरा स्वच्छ पुसून घ्या. कच्चं दूध आणि दही त्वचेला स्वच्छ करून छान मॉईश्चराईज करतात.

यानंतर एखाद्या मिनिटासाठी वाफ घ्या. वाफेसाठी तुम्ही मशिनही वापरू शकता किंवा मग पातेल्यामध्ये पाणी गरम करून त्यानेही वाफ घेऊ शकता.

वाफ घेतल्यानंतर त्वचेला स्क्रबिंग करणं गरजेचं आहे. यासाठी कॉफी पावडर, पिठीसाखर, मध आणि २ ते ३ थेंब खोबरेल तेल हे मिश्रण एका वाटीमध्ये एकत्र करा. या मिश्रणाने त्वचेला हलक्या हाताने गोलाकार चोळून ५ ते ७ मिनिटांसाठी मसाज करा. यामुळे टॅनिंग, ब्लॅक हेड्स, व्हाईट हेड्स कमी होतात.

यानंतर चेहऱ्यासाठी आपल्याला घरगुती पद्धतीने फेसमास्क तयार करायचा आहे. यासाठी मुलतानी माती आणि गुलाब पाणी एकत्र करा आणि हा लेप चेहऱ्याला लावा. ८ ते १० मिनिटांनी लेप अर्धवट सुकल्यानंतर चेहरा धुवून टाका.

यानंतर चेहरा मॉईश्चराईज करा. बघा त्वचेमध्ये खूप छान बदल झालेला दिसेल. त्वचा छान चमकेल.