Skin Care: हिवाळ्यासाठी घरीच तयार करा नाईट क्रिम, थंडीत त्वचा कोरडी होणारच नाही

पावसाचा जोर ओसरल्याने आता वातावरणात थोडी थंडी जाणवायला लागली आहे. त्वचा थोडीशी कोरडी पडायलाही सुरुवात झाली आहे.

हिवाळ्याच्या दिवसांत त्वचेची थोडी जास्त काळजी घ्यावी लागते. तिला व्यवस्थित मॉईश्चराईज करण्याची गरज असते. तरच त्वचा मऊ, मुलायम राहाते. म्हणूनच हिवाळ्यात नाईट क्रिम आवर्जून लावावे लागते.

आता महागड्या क्रिमवर पैसे खर्च करण्यापेक्षा ग्लिसरीन वापरून घरच्याघरीच नाईट क्रिम कसे तयार करायचे ते पाहा. हा उपाय करण्यासाठी एका वाटीमध्ये १ चमचा ग्लिसरीन घ्या. ग्लिसरीन त्वचेतलं मॉईश्चर टिकवून ठेवण्यास मदत करते.

यानंतर त्यामध्ये २ चमचे ॲलोव्हेरा जेल घाला. ॲलोव्हेरा जेलदेखील त्वचेसाठी अतिशय उत्तम असते. त्यामुळे त्वचा हायड्रेटेड राहण्यास मदत होते.

आता या मिश्रणामध्ये १ व्हिटॅमिन ई कॅप्सूल घाला. कारण व्हिटॅमिन ई त्वचेला तरुण, चमकदार ठेवण्यासाठी मदत करते.

जर तुमची त्वचा खूप ऑईली असेल तर या मिश्रणामध्ये १ चमचा गुलाब जल घाला. आता सगळे पदार्थ व्यवस्थित हलवून घ्या आणि त्याचं क्रिमसारखं मिश्रण तयार झालं की ते एखाद्या एअरटाईट डबीमध्ये घालून ठेवा.

या पद्धतीने तयार केलेलं क्रिम ८ ते १० दिवस चांगलं टिकतं. रोज रात्री झोपण्यापुर्वी हे क्रिम लावून त्वचेला मालिश करा. सकाळी चेहरा धुवून टाका. त्वचेमध्ये खूप छान फरक दिसून येईल.